Donibaneko saneamenduko lanak urtea bukatu baino lehen hastea eskatu du Alberrok
Pasaiako alkateak gutun bat bidali dio Jose Ignacio Asensio Jasangarritasun diputatuari 2023an hartutako konpromisoak urgentziaz betetzeko.
Teo Alberro, Pasaiako alkateak, gutun bat bidali dio Gipuzkoako Foru Aldundiko Jasangarritasun diputatu Jose Ignacio Asensiori, Donibaneko saneamendu lanen hasierako atzerapenak bukatzeko eta lanak 2025a bukatu baino lehen has daitezen eskatzeko.
Gutunean, Alberrok Pasaiako Udalaren eta Donibaneko bizilagunen “kezka sakona” jaso du, justifikaezina deritzon atzerapen baten aurrean: “Herritarrek urteak daramatzat aspaldi gauzatu behar zen oinarrizko azpiegitura bat eskatzen, indarrean dagoen legeriaren eta hartutako konpromiso instituzionalen arabera”.
Alkateak gogorarazi du 2023an lankidetza hitzarmen bat sinatu zutela Gipuzkoako Foru Aldundiak, Pasaiako Udalak eta inplikatutako beste erakunde batzuek. Hitzarmen horretan, obraren lehen faserako finantzaketa eta gauzatze epeak zehazten zirela adierazi du Alberrok. Bi urte geroago, hitzarmenean adostutako konpromisoak bete ez direla deitoratu du alkateak, eta “enegarrenez” ezerezean gelditu direla esan du.
Alberrok baietsi du udalak bete dituela hitzarmenean ezarritako konpromiso guztiak: beharrezko baimenak eskatzea eta obra hori gauzatu ahal izateko partida gaitzea udal aurrekontuetan (2023tik jasota egon dena urtero). Hala ere, proiektuak geldirik jarraitzen du.
Asensiori igorritako gutunean, lau eskakizun egin dizkio Alberrok:
- Donibaneko saneamendu proiektuarekin duen konpromisoa berrestea eta premiaz kontratatzea Obra Hidraulikoen zuzendariarekin adostu berri den fasearen idazketa.
- Pasaiako Udalarekin sinatutako lankidetza hitzarmena berritzea, konpromiso ekonomikoak eta lehen fasearen gauzatze epeak berriro formalizatuz (Bizkaia-Juan XXIII).
- Obrak lizitatu eta hastea proiektua bukatu bezain laster, lanak urtea bukatu baino lehen has daitezen.
- Proiektuaren planteamendu berria herritarrei jendaurrean aurkeztea, 2021eko urrian egin zen bezala.
“Oraingo honetan ulertzen dugu obrak badituela hori lehenbailehen gauzatzeko behar diren osagai guztiak: konpromiso soziala, akordio ekonomiko eta instituzionala eta urteak itxaroten daramatzan herria. Espero dugu, diputatuaren gidaritzapean, Pasaiak hainbeste espero eta behar duen proiektu honi behin betiko bultzada ematea”, adierazi du Alberrok.
