Euskaraz jolasean aritzeko, Parketarrak
Udalak euskaraz jolasean aritzeko Parketarrak egitasmoa jarriko du martxan lau barrutietan. Saioak hilaren 19tik ekainaren 12ra bitartean izango dira.
Pasaiako Udalak euskaraz jolasean aritzeko Parketarrak izeneko egitasmoa aurkeztu du. Parketarrak Euskaraldiarekin batera jarriko da martxan, hilaren 19tik ekainaren 12ra bitartean gauzatuko baitira iniziatibaren baitan antolatu dituzten saioak. Orotara, 16 saio izango ditu Parketarrak programak, lau barruti bakoitzeko. Euskaraz jolasean aritzeko egitasmoa astelehenetik ostegunera egingo da, arratsaldez.
Parketarrak-en funtzionamendua sinplea da, familiak barrutietako parke eta plazetan bilduko baitira euskaraz jolasteko. Egitasmoa 3 eta 5 urte bitarteko haurrei eta haien familiei begirakoa da. Jolasa da jardueraren ardatza, eta jolasguneetan egongo diren hezitzaileek dinamizatuko eta gidatuko dituzte ekintza guztiak. Hezitzaileak egongo diren arren, udalak adierazi du garrantzitsua izango dela haurrekin batera gurasoek edo arduradunek ere parte hartzea, haiek baitira haur horien erreferentziazko pertsonak. Familia bidezko transmisioan eragiteko, familien inplikazioa “ezinbestekoa” dela iritzi du udalak.
Saio guztiak doakoak izango dira, eta ordubeteko iraupena izango dute. Horrez gain, ez da parte hartzaile mugarik jarriko eta ez da aurrez izena eman beharko. Hezitzaileek inguruan dauden 3 eta 5 urte bitarteko haur guztiak eta haien familiak gonbidatuko dituzte Parketarrak-en parte hartzera.
Parketarrak Bokale Pasaiako Euskararen Aholku Batzordearen bidez iritsiko da udalerriko jolasguneetara, eta bere helburua da euskararen erabilera aisialdiaren eremuan indartzea, haurrak eta familiak jolasean dabiltzanean euskaraz aritzeko. Egitasmoak bat egin du Euskaraldiko helburuekin; horregatik jarriko da martxan euskararen sustapena ardatz duen ariketa masiboarekin batera.
Udalak jakinarazi du hezitzaileek partaideen ezaugarrien arabera moldatuko dituztela saioak. Saioak euskaraz izango dira, baina udalak argi utzi du parte hartzeko ez dela beharrezkoa euskara ulertzea, hezitzaileak arduratuko baitira partaideek jolasen azalpenak ulertu dituztela bermatzeaz. Horrez gain, taldearen ezaugarrien arabera, hezitzaileek aproposenak diren jolasak hautatuko dituzte.
Parketarrak-en egitaraua barrutika
Donibane
- Eguna: Astelehenetan: hilak 19 eta 26 eta ekainak 2 eta 9.
- Ordua: 17:00etan.
- Lekua: JJ Otaegi plazan (euriarekin frontoian).
Antxo
- Eguna: Asteartetan: hilak 20 eta 27 eta ekainak 3 eta 10.
- Ordua: 17:30ean.
- Lekua: Ibaiondo plazan (euriarekin frontoian).
San Pedro
- Eguna: Astelehenetan: hilak 21 eta 28 eta ekainak 4 eta 11.
- Ordua: 17:30ean.
- Lekua: Frontoian (euriarekin Proisako aterpean).
Trintxerpe
- Eguna: Astelehenetan: hilak 22 eta 29 eta ekainak 5 eta 12.
- Ordua: 17:15ean.
- Lekua: Gudari plazako parkean.
