19:00etan hasiko da Lezoko Euskaraldia
Ekitaldia eta herri argazkia egingo dituzte Gurutze Santuaren plazan. Hilaren 25era arteko egunak ekitaldiz bete ditu herri batzordeak.
Oroitzene AEK-ko goizeko ikasleak, Euskaraldirako prest. Oroitzene AEK Iritsi da eguna. Gaur hasiko da laugarren Euskaraldia. Euskarak kaleak, plazak, txokoak, dendak, tabernak, kiroldegiak eta kultur aretoak hartu behar ditu. Dakitenek hitz egin, ikasteko bidean direnek entzun eta mingaina askatu; ez dakitenek errespetatu eta euskarara batu. Ahobizi eta belarriprest txapak ikusten hasiko dira herrietatik. Konpromiso bat hartu dute horiek bereizgarri horiekin, gutxienez hilaren 25era arte luzatuko dena. Handik aurrera ere euskarari ufada ematen jarraitzea da horien, eta denen desioa. Lezon ere gaur hasiko da Euskaraldia.
19:00etan izango da, Gurutze Santuaren plazan, herriko Euskaraldia hasteko ekitaldia. Lezo erdi-erdian. Hala behar du. Hizlariek esandakoaren ondotik herri argazkia aterako dute. Indartsua behar du izan, beraz, egitasmoarekin bat egin dutenei eskatu diete han izateko. Iniziatiba kolektiboa baita Euskaraldia, eta konpromiso pertsonaletik abiatzen bada ere, elkar topatzeko gunean ere ezarri dituzte Lezon eta Euskal Herri osoan.
Gaurko abialdiaren ondoren asko dira Lezoko herri batzordeak antolatu dituenak. Beheko zerrendan ikus daitezke denak.
Hilak 15, osteguna
- 19:00etan, Gurutze Santuaren plazan, hasiera ekitaldia. Gainera, 17:00etatik 18:00etara txapak banatzeko mahaia jarriko dute plazan bertan.
Hilak 16, ostirala
- 18:30ean, triki-poteoa.
Hilak 17, larunbata
- 12:30ean, Aiton-Amonen Bordatik, kantu jira. Gainera, Karlos Saldise plazan Lezokoak elkartearen paellada egingo da, eta han banatuko dituzte Euskaparate Lehiaketaren sariak.
Hilak 20, asteartea
- 18:30ean, Gurutze Santuaren plazan, euskara ikasleei omenaldia.
Hilak 21, asteazkena
- 18:15ean, Andreone Udal Liburutegian, Txantxangorria txantxate ipuin kontaketa Ixabel Agirresaroberen eskutik.
Hilak 23, ostirala
- 21:30ean, Ibaiondon, kantu afaria. Txartelak Tiñelun eta Txingurrin salgai.
Hilak 25, igandea
- 09:00etan, Gurutze Santuaren plazatik, mendi irteera 11 bide, 11 txoko, 11 euskal izen izenburupean. Ondoren, bazkari autogestionatua plazan, eta Imuntzo eta Belokirekin erromeria (17:00).
