Ziztatzera dator Eztena
Mikelazulo Kultur Elkartean aurkeztu dute Eztena jaialdiaren 17. ekitaldia. Ekainaren 5etik 8ra egingo dute.
Larunbata data berezia izan zuen Eztena jaialdiak. Maiatzaren 17arekin aurkeztu baitute arte eszenikoen jaialdiaren 17. ekitaldia. Ez dute aurkezpen hori ez edonon ezta edonola egin, gainera, jaialdiaren habi eta haztegi izan zen Mikelazulo aukeratu baitzuten egiteko horretarako. Jaialdiaren eta aurtengo nondik norakoen berri eman zuten antolatzaileek, eta Aizpea Otaegi alkateak ere ez zuen hutsik egin aurkezpen ekitaldi horretan, urteroko zitari fin erantzunda.
Aurkezpenerako Iaiaiai irrintzi Taldearen Irrintzi lana eta Idoia Tapiaren Alter Nation aukeratu zituzten gainera, antolatzaileek, ekainaren 5etik 8ra egosiko denaren aurrerapen gisa. askotariko konpainia eta sortzaileak ekarriko dituela Errenteria-Oreretara. Sarrerak eskuratzeko klik hemen. Aurten gainera sarrera-bonua jarri dute erabiltzaileen eskura.
Bideoan jaso du larunbateko aurkezpen hori HITZAko Alaine Aranburu Etxegoienek.
Edukietan, formetan zein antolakuntza moduetan arriskuak hartzen zituztenei plaza bat eskaintzea zuen helburu jaialdiak sorreran, eta horretan jarraitzen du 2008az geroztik. Duela bi urte ordura arte Eztena jaialdiko antolakuntzan aritu ziren eskarmentudunek esperimentu berria egitea erabaki zutela gogora ekarri dute antolatzaileek: arte eszenikoen bueltan ari diren hainbat gazteri pasa zieten Eztena martxan jartzeko ardura. Ez zuten, antza, batere gaizki egin gazte horiek, aurten ere beteranoen eta gazte horien arteko fusioaren emaitza izango delako Eztena Jaialdia.
