Fauna populazioa babesteko, trafiko seinaleak
Listorretako eremuan, Bizarain mendiaren hego magalean eta Kutarron jarri ditu seinaleak udalak.
Kukulumera eremuan izan daitekeela eta tentuz gidatzeko seinalea. Trafiko seinale berriak jarri ditu Errenteriako Udalak San Marko eta Listorreta inguruetan. Ez dira ohiko seinaleak, izan ere, fauna populazioa babesteko jarri ditu Bizarain mendiaren hegoaldeko magalean, eta Kutarron. Horien bidez, errepidetatik gertu bizi diren eta normalean errepide horiek zeharkatzen dituzten fauna populazioak daudela ohartaraztea du helburu.
Mehatxatutako fauna populazioak ohikoak direla Errenteria-Oreretako babestutako natur guneetan azaldu du udalak: “Era berean, fauna talde askoren kontserbazio ekologikoaren egoera kolokan dago, mehatxu ugari jasaten baitituzte”. Kolokan dauden horien artean bi basa animalia mota aipatu ditu: intsektuak eta anfibioak, “bereziki kalteberak dira eta galtzen ari dira, eta gure udalerrian badute presentzia”.
Ibilgailuen joan etorriak faunarentzat mehatxua da oro har, eta ez bakarrik ugaztun handientzat. Ornogabeen espezie babestuak, hala nola, kukulumera, uhandre palmatua, txantxiku arrunta, apo iberiarra, baso igel gorria, edo ur igel berdea bezalako anfibioak, askotan Errenteria-Oreretako trafiko harrapaketen biktima direla zehaztu du udalak, “azken urteotan udalak udalerriko eremu babestuen kudeaketari buruz kontratatu dituen ikerketa ezberdinetan antzeman dira mehatxu horiek”.
Seinaleak jarrita, jaramon egiteko eskatu di orain herritarrei udalak, “soilik elkarlanean kontserbatuko da oraindik irauten duen bioaniztasuna”.
Seinale berriak fauna babesteko (1)
