Gaztañoko abordatzea prest dute piratek
Gaztañoko jaiek badute irudia egitaraurako zein kamisetarako. Egitaraua ere prest dute, eta lehenengo egunekoa zabaldu dute dagoeneko.
ekainaren 13tik 15era izango dira Gaztañoko festak. Gero eta gertuago dira Gaztañoko jaiak, eta piratek ere prest dute abordatzea. Behin gaia aukeratuta, piratak aurten, marrazki lehiaketa antolatu zuen gaztañoko jai batzordeak egitaraua eta jaietako kamisetarako. Hamar proposamen jaso zituzten denera, eta bi marrazkik berdinketa egin zuten; bata jai egitaraurako baliatu dute, eta bestea, berriz, kamisetarako.
Kamiseta prest dute, baita jai egitaraua ere. Urtero egin moduan, apurka joango dira jai batzordeko kideak aletzen ondu duten ekintza sorta, eta momentuz, lehen eguneko egitaraua azaldu dute. Pontx pailazoaren emanaldiak hasiko ditu jaiak eta ondoren Maritxuk abordatuko du auzoa trikitilari eta buruhandiek lagunduta.
Tradizioari jarraituta, Iratxo iturria irekiko dute eta mundu osoan ezaguna den patata tortilla lehiaketaren saria irabazten saiatuko dira auzotarrak.
Gaztañorockek ez du hutsik egingo aurten ere, eta plaza nagusian bilduko ditu The Iiingles, Mala Ruina eta Ahuntzak taldeak. Kontzertuaren ondoren, Zabala Enea II portuan DJ Txatxis ariko da jaiak girotzen eta Bukagaitz ontzian, berriz, DJ Gusturika. The Iiingles taldeak aipamen berezia merezi du; taldekide guztiak emakumeak dira, hondarribiarrak, eta emakumeek sortutako abestiak bertsionatzen dituzte.
