Otxote topaketaren hamalaugarrena, igandean
Hiru otxote berrik hartuko dute parte igandean egingo duten Errenteriako Otxote Topaketaren XIV ekitaldian.
Igandean otxoteena izango da Errenteria-Orereta. Niessen elkartearen iniziatibaz, hamalaugarrenez egingo dute Errenteriako Otxote Topaketa. Gaur aurkeztu dute antolatzaileek aurtengo topaketa, eta berrikuntzarik badela adierazi dute, izan ere hiru otxote berrik hartuko dute parte: Bergarako Alai Berrik, Hondarribiako Kanta Kantemusek, eta Trintxerpeko Illunbek. Oreretako Karnaba otxotea klasiko bat da topaketan, eta Donostiako Easok bigarrena izango da.
Easo emakumeek osatutako taldea da. Iaz emanaldi ederra eskaini zutela azaldu du Alberto Mendigutxiak Niessen elkarteko kideak, baita Karnaba otxoteko abeslaria ere. Emakumeek osatutako abesbatza eta otxoteak aurkitzeko zailtasunak jarri ditu nabarmen, “oso urriak dira, zaila da aurkitzea emakume otxoteak. Gizonezkoen kasuan ere zaila da, eta emakumeetan are zailagoa”.
Zailtasunak zailtasun, aurtengo topaketan bigarren emakume otxote bat ere arituko da, lehen aldia izango du horrek, Kanta Kantemus da.
Illunbeko zuzendariak, Josu Elberdinek, obra bat egin du ekitaldi honetan berariaz estreinatzeko, eta esker ona adierazi dio Mendigutxiak, “oso garrantzitsua da halako konpositore batek egitea obra bat eta gure elkartearentzat oso garrantzitsua estreinaldia hemen egitea”.
Babesleei ere eskerrak Mendigutxiak, “posible egiten dutelako euren laguntzarekin egun ederra aurrera ateratzea”. Horrekin lotuta herritarrei tokiko komertzioan eta Errenteriako azokan erosteko deia egin die Niessen elkarteko kideak .
Madalenaren ermitan hasiko dute emanaldia 12:00etan. Ondoren, 13:30etik 12:30era hainbat tabernetan barrena ibiliko dira: Bite, Maite, Aralar, Gamon 14, La Bodeguita, Iñaki, Aker eta Bixigarrin. Jendea bertaratzera deitu dute, “askok pentsatzen du abesbatza emanaldiak aspergarriak direla, baina kantua izan daiteke dibertigarria, tabernetatik joatea kantua jendearengana hurbiltzeko da, ongi abestuz disfrutatu daitekeela erakusteko”.
