Gaintxurizketako oinezkoen behin-behineko pasabidearen lanak, aurrera
Pasabidearen egitura nagusia jartzeko lanengatik Gi-636 errepidea erabat moztuko dute, Lanbarren eta Gaintxurizketako biribilgunaren artean, astearte gauetik (22:00) asteazken goizaldera (06:00).
Pasabidea egiteko lanen gaurko irudia.Gipuzkoako Foru Aldundia Aurrera doaz Gaintxurizketako behin-behineko oinezkoen pasabidea (gerora behin betikoa izango dena) egiteko lanak. Lezoko Udala inguruetan ari da jarduketak egiten, pasabidera iristeko bidea segurua izan dadin. Gipuzkoako Foru Aldundia, berriz, batik bat pasabidea bera izango denean dago zentratua, aldamio bidezko egitura osatzeko bidean da. Horregatik, eta pasarelaren egitura nagusia jartzeko, trafikoan mozketak izango dira datorren astean: astearteko (hilaren 27ko) 22:00etatik, asteazkeneko (hilak 28) 06:00etara Gi-636 errepidea erabat itxiko da egitura hori jarri ahal izateko, Lanbarrengo eta Gaintxurizketako gaineko biribilguneen artean. Euskotrenen geltokiaren pareko horretan ari dira eraikitzen errepidea goitik gainditzeko pasabidea.
Gipuzkoako Foru Aldundiak zehaztu du egiturak 14 metroko luzera eta 5,5 metroko altuera dituela. Hala, aste honetan pasabidearen bi aldeetako zutabeak instalatu dituzte, eta behin datorren astean pasabidea izango dena jarrita, eskailerak ezartzeari ekingo diote beharginek. Horrek esan nahi du, eta aldundiak hala jakinarazi du, laster izango dela erabilgarri auzotarren eta inguruan lan egiten dutenen segurtasuna bermatuko duen azpiegitura.
Zubibidea egiteaz gainera, pertsonen segurtasuna zaintzeko eta trafiko istripuak ekiditeko beste hainbat neurri jarriko dira indarrean Adibidez, Altamirako tunelaren eta Gaintxurizketako biribilgunearen arteko ibilgailuen abiadura muga orduko 70 kilometrora jaitsiko dute; gainera, seinalizazioa ere indartuko dute; eta bestetik, aldundiak iragarri du “radar pedagogikoak” jarriko direla. Bestalde, Gi-636aren tarte horretan erreien arteko bereizketa are nabarmenagoa izango dela esan du foru erakundeak, errepidean lerro jarraitu bikoitza ezarrita.
