Aniztasunaren kalejirak herriko kaleak musikaz koloreztatu ditu
11 kolore jaialdiaren hirugarren egunean Burubeltz konpartsak eta Nirawa batukadak kalejira koloretsua osatu zuen. Herriko Plazatik irten eta Zumardian hartu zuten atseden.
Kultura aniztasunaren Nazioarteko Egunaren haitzakian bost eguneko egitarau zabala prestatu du Errenteria-Oreretako Udalak, herriko hainbat eragilerekin batera. Herriko kultura aniztasuna ospatzeko asmoz hamaika jarduera prestatu dituzte 11 Kolore Jaialdiaren baitan. Horietako bat izan zen atzo arratsaldean Burubeltz konpartsak eta Nirawa batukadak egindako kalejira.
Herriko kaleak kolorez eta perkusio doinuz bete zituzten, alaitasuna transmitituz eta haur, heldu zein nagusiei gozamenerako tarte bat eskainiz. 17:30ean abiatu zen kalejira, Herriko Plazatik, eta Erdigunea eta Iztieta zeharkatuta, Zumardian hartu zuten atseden.
Ekintza honetan haurrak izan ziren protagonista, herriko ikastetxe guztiek hartu baitzuten parte. Konpartsetako pertsonaien karetak margotzeko eginkizuna izan zuten, eta horiek soinean kalejirari kolore berezia eman zioten.
