10.000 euroko diru laguntza, arte sorkuntza sustatzeko
Oiartzungo Udalak jarri du martxan ekimena, eta proiektu berriak abiarazi nahi dituzten sortzaileak babestea du helburu. Eskaerak aurkez daitezke dagoeneko.
Oiartzungo Udalak jakinarazi du arte sorkuntza eta ekoizpen prozesuak bultzatzeko diru laguntza deialdi berria jarri duela martxan lan artistikoak sortzen ari diren edota proiektu berriak abiarazi nahi dituzten sortzailek babesteko. Honako diziplinei eragingo die laguntzak: zinema, ikus entzunezkoak, argazkigintza, dantza, literatura, musika, antzerkia eta arte plastikoak.
2022an jarri zuen udalak diru laguntza martxan, eta orduz geroztik 27 proiekturi eman die babesa. Aurtengo deialdian 10.000 euro bideratuko dituzte laguntzetarako, eta, besteak beste, proiektuaren interesgarritasuna, kalitatea zein originaltasuna, Oiartzungo artista/egilea izatea eta proiektuaren garatze prozesuan herritarren inplikazioa lortzea bezalakoak baloratuko dituzte.
Eskaerak aurkezteko epea dagoeneko ireki dute, eta ekainaren 29a izango da horretarako azken eguna. Oinarriak eta xehetasunak hemen ikus daitezke.
