"Ez dut erreleborik ikusten; nirekin bukatuko da Baleio"
Iñigo Isasa oiartzuarrak kudeatzen du Oiartzungo Baleio sagardotegia, eta, bihar, Done Eztebe plazan izango da berak ekoitzitako edariarekin. Txotxik ez duen Gipuzkoako sagardotegi bakarra da Baleio.
Baleio sagardotegiak urteak daramatza Oiartzungo Sagardo Egunean parte hartzen, eta, aurten ere ez da gutxiagorako izango. Iñigo Isasa sagardogileak 1992an hartu zion sagardotegia haren osabari, eta, besteak beste, sagardoaren sortze prozesuaz eta Sagardo Egunaren inguruan mintzatu da.
Zenbagarrenez joango zarete Oiartzungo Sagardo Egunera?
Ez dakit esaten, baina ziur 30 urte badirela. Hasieratik joaten garela esango nuke.
Urteen poderioz sumatu duzu aldaketarik Oiartzungo Sagardo Egunean?
Tira, handitzen joan da. Hasieran uste dut bertso astearen barruan egiten zela; alegia, sagardo dastaketa zen beste egitarau baten barruan antolatutako ekintza bat.
Orain, ordea, jendeak badaki maiatzeko azken larunbatean Sagardo Eguna ospatzen dela. Esango nuke hasiera-hasieran baino indar gehiago duela.
Nola egiten duzue lan Baleion?
Sagardoa egiten dugu soilik; ez dugu otordurik ematen. Beti bezala, udazkenean egiten dugu sagardoa. Garaia heltzen denean sagarrak ekarri eta erosten ditugu, eta behin horiek lortuta sagardoaren elaborazioarekin hasten gara. Azken pausua edaria botiletan sartzea izaten da, eta behin hori eginda saldu egiten dugu.
Ez daukagu txotxik; txotxik ez duen Gipuzkoako sagardotegi bakarra gara.
Nongo sagarrak erabiltzen dituzue?
Inguruan, Oarsoaldean sagarrak daudenean bertakoak erabiltzen ditut. Normalean, ehuneko laurogei inguru Oiartzundik hartzen dut, baina Irundik ere, esaterako, hartzen ditut batzuetan.
Hala ere, urteak izaten dira; sagarrak urte batean ematen du eta hurrengoan ez, hortaz, urte batzuk egoten dira zeinetan hemen [Oarsoaldean] oso sagar gutxi egoten den. Kasu horietan kanpotik ekartzen dugu sagarra, normalean Bretainia eta Normandiatik.
Zenbat sagardo mota egiten dituzue?
Bakarra.
Eta nola deskribatuko zenuke haren zaporea?
Urtetik urtera aldatzen joaten da, ez da beste edari batzuk bezala; batzuk beti zapore bera izaten dute, baina sagardoak ez. Aldatzen joaten da.
Alabaina, esango nuke sagar gorputz dezente duela eta zapore suabea duela Baleio sagardoak.
Zerk egiten du Baleio sagardoa ezberdin?
Sagardo onak alde guztietan daude; bakoitzak bere ñabardurak ditu. Jendeak hautatzeko aukera izan behar du, eta horretarako da Sagardo Eguna.
Jendeak sagardo ezberdinak dastatu behar ditu, eta norbere kabuz aukeratu behar du bakoitzak zein den sagardo onena. Sagardo guztia sagarretik heldu denez, ez nuke esango nirea berezia denik.
Sagardotegi batentzat zer suposatzen du sagardo egun batean egoteak?
Egun horretan sagardoa da protagonista, eta hori garrantzitsua da. Gainera, guk egindako lanaren emaitza jendaurrean jartzeko eguna izaten da.
Egun horretan jende gaztea ibiltzen da, eta hor dago etorkizuna.
Zein da Baleioren historia?
Nik nire osabari hartu nion sagardotegia, 1992an. Lehen ganadua —behiak eta ardiak— genuen, eta sagardoa ere egiten genuen, baina hori bestelako laguntza txiki bat zen.
Gero, 1996an ganadua kendu eta sagardoa egiten hasi nintzen.
Betidanik egin izan dugu sagardoa; nik hartu aurretik osabak eta aitonak egiten bazuten ere, beste osagarri bat zen.
Zein etorkizun ikusten diozu zure sagardotegiari?
Ez dut erreleborik ikusten. Baleio nirekin bukatuko da. Uste dut sagardoaren munduan nire kasu berberean aurkitzen den jende asko dagoela.
Jendeak, gaur egun, ez du horrelako loturarik egin nahi, eta atzetik datozenek beste gauza batzuk nahi dituzte.
Oiartzun, sagardoak
- Altuna
- Arkale
- Baleio
- Bianditz
- Erroilbide
- Goiko
- Lastaola
- Harritxuita
- Igoin
- Larregain
- Lindurenborda
- Lizeaga
- Monondi
- Oialume Zar
- Oianleku
- Ordozelai
- Petritegi
- Txurrumurru
- Urkabe
