Gipuzkoako erretiratuen mahai jokoen finalak Pasaian jokatu dira
AGIJUPENS elkarteak antolatuta, finalak Trintxerpeko erretiratuen egoitzan jokatu ziren, hilaren 22an. Sari asko Pasaian geratu ziren.
Hilaren 22an Gipuzkoako erretiratuen mahai jokoen finalak jokatu ziren Pasaian, Gipuzkoako Jubilatu eta Pentsiodunen Federazioak (AGIJUPENS) antolatuta. Final horiek Trintxerpeko erretiratuen etxean izan ziren. Parte hartzaileak musean, tutean, eskoban, briskan, punttuan, seiko urrean, igel jokoan, tokan, pote jokoan, txintxonean eta xakean aritu ziren, eta Trintxerpeko, Debako, Tolosako, Urretxuko, Ormaiztegiko, Beasaingo, Legazpiko, Villabonako, Idiazabalgo, Amarotzko, Legorretako eta Oñatiko erretiratuen etxeetako ordezkariak bildu ziren Trintxerpen.
Iragan osteguneko ekitaldian, Iraitz Pazos barrutiko alkateordea eta Julen Rodriguez Kirol zinegotzia izan ziren, finalak bertatik bertara jarraitzeko eta irabazleei garaikurrak emateko. Sari asko, gainera, Pasaian geratu ziren, etxean. Andres Romero eta Jose Luis Torres txapeldun izan ziren eskoban, eta Jose Ramon Otero eta Jesus Carballo tokan eta Manuel Iglesias xakean, txapeldunorde izan ziren. Finalak jokatu ondoren, Donibaneko Ontziola jatetxean bazkaldu zuten parte hartzaile guztiek.
Aurtengo ikasturtean, Pasaiako Udalak xakean ikasteko aukera eskaini du erretiratuen egoitzetan, estimulazio kognitiboa lantzen duen kirola baita. Modalitate horretan, txapeldunorde izan berri da Manuel Iglesias. Horren harira, Trintxerpeko Jubilatuen Elkarteko Zuzendaritza Batzordeak eskerrak eman dizkio udalari bazkideen artean xakea sustatzeko egin duten lanagatik.
