"Jolasa ezinbesteko elementua da sormenean"
Lezo Eszena egitasmoaren barruan, bi eguneko dramaturgia tailerra emango du Oregik, ekainaren 14an eta 21ean. Herritar orori zabalik da ikastaroa.
Jokin Oregi Iñurrieta. Lezok arte eszenikoekin harreman sendoa du. Asko dira hori baieztatzeko adierazleak: urtero-urtero parerik gabeko arte eszenikoen programazioa du, herrian antzerki talde sendoa dago, eta gainera, jada hirugarren urtez martxan da Euskarazko Antzerki Testu Laburren Lehiaketa. Horri elementu berri behar erantsi behar zaio: herritarrentzat dramaturgia tailerra. Antzerki testuak nola egiten diren ikasteko bi eguneko jarduera ekainaren 14an eta 21ean izango da Kultura Aretoan (10:00-14:00). Jokin Oregi Iñurrieta (Soraluze, 1970) aktore, antzerkigile eta Marie de Jongh konpainiako zuzendariak gidatuko ditu saioak. Lezo Eszena egitasmoaren barrukoa da tailerra, Hika Teatroa konpainiak eta Lezoko Udalak sustatutakoa. Izena emateko hika@hikateatroa.eus posta elektronikora mezua bidali behar da.
Zer egingo duzue tailerrean?
Ez da sakoneko tailerra izango, bi egunekoa delako. Baina aukera oso polita izango da testu laburren inguruan kokatzeko. Lezon bada horren gaineko lehiaketa, oso ideia ederra eta erakargarria da jolasean oinarritua dagoelako. Eta jolasa ezinbesteko elementua da sormenean. Hortik tiraka bideratuko dut tailerra, jolasaren bidez testuak eta ideiak garatzea da asmoa, istorioak eta aukerak garatzea, gero testu bihurtzeko bidea egin dezaten, eta zergatik ez, Lezoko lehiaketaraino iristeko.
Herritar orori zabaldu da tailerrean parte hartzeko aukera.
Bai, edonor etor daiteke. Tailerrak ez du eskatzen aurretik nolabaiteko hezkuntza edo eskarmentu maila bat izatea. Jolaserako eta sormenerako gogoa duen edozein ongietorria izango da, eta gainera, ondo pasako dugu. Hori da asmoa. Tailerrean denok izango gara aktibo, eta jolasaren bidez ideiak loratzera behintzat iritsiko gara, baita norberaren burua ernatu eta ideien haziak ereitera ere.
Ez da kasualitatea Lezon egitea tailerra, ezta?
Ez. Lezo antzerkigintzarekin egiten ari den lana sekulakoa eta eredugarria dela iruditzen zait. Gogo ezberdinak elkartu direlako gertatzen ari da hori. Udaleko Kultura Sailaren arte eszenikoan aldeko apustua irmo eta sakona da, eta badakite zein diren antzerkigintzaren premiak, beharrak eta funtzioak. Kultur bazka eder bat, eta denak aberastu eta gozatzeko eskaintza garatzen ari dira udaletik.
Horren seinaleetakoa da Hika Teatroarekin Lezon garatzen ari den elkarlana. Udalaren begirada zabaletik eta Hikaren eskarmentu profesionaletik oso itxaropentsua den bide bat sortu da. Emaitzak ematen ari da gainera: testu laburren lehiaketaren finala, adibidez, sekulakoa izaten da, sona handiko izenekin eta publikoaren jarraipen zabalarekin. Bitxi bat sortu da lehiaketarekin Lezon, eta mantendu egin behar da.
Tailerra, futbolarekin alderaketa eginez, Zubieta edo Lezama txiki bat izan daiteke?
Gauza guztiak probatu egin behar dira. Ikusi muskulurik ote dagoen, jendeak horrelakoen premiarik ote duen. Asko esatea litzateke Zubietan edo Lezaman bezala harrobi lanean arituko garela tailerrarekin, baina denborarekin, hau guztia laborategi antzeko bat bihur daiteke jolasaren bidezko esperimentuak egiteko, sormena oinarri.
Ekainean tailerra emango duzu, baina iaz, Lezoko Euskarazko Antzerki Testu Laburren II. Lehiaketa irabazi zenuen. Soraluzekoa izan arren, ia-ia lezoar karneta lortua duzu…
[Barrez] Bai, bai! Aurretiaz ere Lezon izandakoa naiz nire antzerki konpainiarekin, sarritan gainera. Oso ondo hartuak izan gara beti. Gezala antzoki txiki, gertuko eta intimoa da. Publiko fidela dago Lezon. Horrek sekulako meritua du, bitxia duzue Lezon.
Bilboko Cafe Bar Bilbaok ere testu laburren lehiaketa egiten du. Hango epaimahaikide naiz, beraz, ezin du parte hartu. Lezokoak aukera eman dit testuak egitera animatzeko. Ederra izan zen irabazle izatea, eta finalean testuak sekulako harrera ona izan zuela esan zidaten.
Sekulako bidea duzu egina oholtza eta foku artean. Baina tailerrean, herritarrekin aurrez aurre egoteko aukera polita izango duzu, ezta?
Kilometro asko egindakoa naiz, bai. Baina oholtzen eta fokuen liluratik at lurrera jaisten ere badakit. Bizitza hori da: denari ekin behar zaio. Argiak itzaltzen diren uneak ere badaude, eta hor gabiltza, pozarren gainera, borrokan. Gustatuko litzaidake tailerrean adin ezberdinetako jendeak parte har dezala, nerabeak, helduak, adinekoak… Horiek denak elkartzea, eta Valentzian izandako esperientzia aberasgarri batean oinarritzen ari naiz hori esateko. 16 urtetik gorako jendea animatuko balitz, baita adinekoak ere, sekulakoa litzateke. Lezon eta inguruko jendea anima dadila, duten adina izanda ere denak ongietorriak izango direlako.
