Musikaz Blaik trafiko aldaketak sortuko ditu Trintxerpen
Martxan da XVI. Musikaz Blai. Bihar eta etzi hainbat ekitaldi jasoko ditu barrutiak, eta trafikoan eragina izango dute.
Martxan da XVI. Musikaz Blai. Atzo Pasaiako Udal Musika eta Dantza Eskolako taldeek dantzan eta kantuan jarri zituzten Serafin Esnaola plazan bildutakoak. Gaur Musika Modernoaren eta Konboen jaialdia jasoko du Serafin Esnaolak, 18:00etatik aurrera. Musika eta dantza uztartzen dituen zikloak jarraipena izango du asteburuan, eta bihar eta etzi egingo diren ekitaldiek trafiko aldaketak ekarriko dituzte Trintxerpera.
Bihar (larunbata) trikiti eta panderoen kalejira egingo da 12:00etatik 13:00etara. Kalejira horrek trafiko mozketa laburrak eragingo ditu Donostia kalean, Urgull kalean, Oiartzun kalean, Ulia etorbidean, Azkuene kalean, Euskadi etorbidean eta Gernika plazan. 12:00etatik 13:00etara, E-8 autobusa ez da Trintxerpeko goiko aldera iritsiko. Hori dela eta Ricardo Arrillaga 6, Gran Sol 3, Bordaenea 2, Oiartzun 8, Ulia 22, Azkuene 35 eta Azkuene plazako geltokiak ezabatuko dira.
Igandean, aldiz, txistularien desfilea jasoko du Trintxerpek. 12:00etan kalejiran abiatuko dira, Euskadi etorbidetik. Hori dela eta, Euskadi etorbidea itxita egongo da 11:30etik 13:00etara. Horrez gain, E07, E08 eta E9 autobus lineek Escalerillasen izango dute azken geltokia. Ibilgailuak goiko aldetik igo beharko dira San Pedrora sartu eta bertatik irteteko (Arrantzaleen auzoa, Andonaegi eta Azkuene).
