«Txapeldun izateak lasaitasuna eta poz handia eman dizkit»
Espainiako eskrima txapeldun izan berri da sanpedrotarra, 17 urtez azpikoen mailan. Pauso sendoak ematen ari da, eta aurten Europako eta Munduko txapelketetan izan da.
Hamazazpi urtez azpikoetan Espainiako eskrima txapeldun izan berri da Markel Amat sanpedrotarra, txapelketa bikaina osatuta. Sorian (Gaztela Leon, Espainia) izan zen, hilaren 17an. Gaztea da, soilik 17 urte dauzka, baina Europako eta Munduko txapelketetan izan da aurten. Orain, Euskadiko eta Espainiako txapelketa absolutuak ditu jomugan, eta amets bezala, Olinpiar Jokoetara iritsi nahiko luke.
Espainiako eskrima txapeldun izendatu berri zara. Zer izan da hori zuretzat?
Denboraldia nahiko gogorra izan da niretzat. Emozioz beteriko sasoia izan da, txapelketa mordoarekin. Denboraldi gogor honen eta egindako lanaren ondoren Espainiako txapeldun izateak lasaitasuna eta poz handia eman dizkit.
Nola joan zen txapelketa?
Maila altua zegoen, baina esango nuke ez dela kategoria edo txapelketa bat zeinak beste batzuk baino gehiago exijitzen didan. Oso kontzentratuta eta sartuta egon behar izan nuen txapelketa osoan, eta teknika eta taktika ondo kudeatuta, txapelketa egingarria izan zen niretzat.
Zein helbururekin joan zinen Soriara? Espero al zenuen irabaztea?
Nire helburua txapelketa hau irabaztea zen. Nire entrenatzailearekin eta taldekideekin hitz eginda, bagenekien maila aldetik besteen gainetik nengoela. Horrek presioa ere badakar, irabazi behar horrek presioa sortzen baitu. Nire helburua, behintzat, podiumean egotea zen, eta dena ondo egitea banuen, irabaztea. Dena primeran atera zen eta txapeldun izan naiz.
Aurten ere Europako eta Munduko txapelketetan izan zara, Turkian eta Txinan, hurrenez hurren. Nolakoak izan dira esperientzia horiek?
Turkiakoa inoiz jokatu dudan txapelketa zailenetarikoa izan da, maila altua baitzegoen eta oso gogorra izan baitzen. Turkiakoa, gainera, jokatu ditudan nazioarteko txapelketen oso antzekoa izan da. Orain, nazioarteko txapelketa garrantzitsuetan sartzen ohitu behar dut, eta gogorra izango da hori. Txinakoa, aldiz, nahiko ondo joan zen, eta uste dut esperientzia falta izan zitzaidala. Txinakoa, batez ere, bidaiagatik izan zen gogorra, zertxobait desorekatu baininduen. Europako Txapelketan lehen hogeien artean sailkatu nintzen, eta Mundukoan 23. postuan bukatu nuen.
Espainiakoa jokatuta, zein dira zure hurrengo erronkak?
Denboraldia bukatzeko bi txapelketa geratzen zaizkit. Lehena hurrengo asteburuan izango da (ekainaren 7koa). Madrilen arituko naiz, Espainiako Txapelketa absolutuan. Ni 17 urtez azpiko mailan izan naiz txapeldun. Hau maila absolutukoa izango da, badakit zailagoa izango dela, baina gogotsu nago. Bestalde, ekaina bukaeran Euskadiko Txapelketa absolutua jokatuko dut. Ondoren, denboraldia bukatu eta oporrak hartuko ditut.
Oso gaztea zara, soilik 17 urte dauzkazu, baina emaitza on asko lortzen ari zara. Kontziente al zara lortzen ari zaren guztiaz?
Nahiko perfekzionista naiz, eta egiten dudana ahalik eta ondoen egitea gustatzen zait. Horrek konstanteki entrenatzera bultzatzen nau. Uste dut taldekideengandik bereizten nauena etxean egiten dudan lana dela, dudan mailara iristea ahalbidetu baitit. Oso garrantzitsua da teknika eta alde fisikoa entrenatzea, baina etxean besteen bideoak ikusteak asko lagundu dit, bertan teknika eta taktika ezberdinak ikasi baititut. Horien analisi sakon bat egiteak asko lagundu dit.
Eskrima ez da kirol mediatiko bat. Nola iritsi zinen kirol horretara? Nondik datorkizu zaletasuna?
LH 3. eta 4. mailan nengoenean, futbolaz kokoteraino nintzen. Gustatzen zitzaidan, baina sentitzen nuen ez nuela praktikatu nahi oinarrizko kirol moduan. Orduan, kirol ezberdinak bilatzen hasi nintzen, eta halako batean, eskrimako kartel bat ikusi nuen kiroldegi batean. Gurasoei esan nien apuntatu nahi nuela, probatu nuen, eta pixkanaka eskrimarekiko maitasuna handitzen joan da.
Eskrimarekiko maitasuna aipatu duzu. Zer da eskrima zuretzat?
Eskrima bizitzen irakatsi didan kirol bat da. Bananako kirola da, eta bizitza nolakoa den ikasten duzu hari esker. Zu bakarrik zaude bizitzaren kontra, eta zure baliabideekin aurrera egin behar duzu ahal duzun moduan. Eskrimak ere autonomoago izaten lagundu dit. Txapelketak beti kanpoan izaten dira, eta autonomia izaten saiatu behar zara. Zuk kudeatu behar duzu zure arropa, zuk kontrolatu behar duzu loa, zuk hartu behar dituzu kontuan ordutegiak, eta zuk berotu behar duzu. Hori guztia norberak egin behar du, eta autonomoago izaten lagundu dit.
Batxilergoko lehen urtea bukatu berri duzu. Nola kudeatzen dituzu entrenamenduak, txapelketak eta ikasketak?
Ikasturtea nahiko gogorra izan da. Nire txapelketa gehienak kanpoan izan dira, eta horrek denbora asko kentzen dit ikasketetarako. Estatu mailako txapelketak egun bakarrekoak edo bikoak izaten dira, baina otsailean atzerriko lehiaketa garrantzitsuak hasi nituen, eta horiek astebetekoak dira. Horiek ordu asko kendu dizkidate. Garrantzitsua izan da irakasleekin hitz egin eta materia aurreratu ahal izatea. Azken azterketak Aste Santuaren ondoren izan direnez, ikasteko aukera izan dut oporraldian. Gogorra izan da, baina irakasleei eskerrak eman nahi dizkiet gauza guztiak egunera eramaten lagundu didatelako. Dena egunera eramatea funtsezkoa izan da.
Donostiako Fortuna klubean ari zara eskriman. Nola doakizu bertan?
Gustura nago klubean. Klub txiki bat gara, baina txikia izateko emaitza onak lortzen ari gara. Gehiago entrenatzea gustatuko litzaidake, baina ditugun baliabideekin ahalik eta gehien entrenatzen dugu, eta pixkanaka hobetzen ari gara. Kluba ondo dago, baina jende gehiago behar dugu gure jarduna aurrera eramateko.
Jendea falta duzuela esan duzu. Nola egingo zenioke dei jendeari eskrimara gerturatzeko? Nola definituko zenuke eskrima?
Eskrima azkartasun fisikoa eta mentala elkartzen dituen kirol bat da. Gauzak ahalik eta azkarren egin behar dituzu aurkaria ez konturatzeko, eta, aldi berean, ahalik eta azkarren pentsatu behar duzu aurkariari aurrea hartzeko. Eskriman honako konbinazioa gakoa da: oso ondo pentsatu behar duzu, eta oso ondo prestatu behar zara fisikoki. Kirol askok dute hori, baina eskrima horren kirol azkarra izanda, pentsatze horrek ia momentukoa izan behar du. Hori da gustatzen zaidan zailtasunetako bat. Ezpatarekin borroka bat egitea ere ikaragarria da.
Eskrimak, gainera, lagun talde bat eman dit. Fortunan oso harreman ona dugu gure artean, lagun talde bat gara. Ordu asko sartzen ditugu denok batera, piña bat gara.
Zein da zure ametsa eskriman?
Ametsa Olinpiar Jokoetara iristea litzateke, eta ahal bada txapelketa hori irabazi nahiko nuke. Hala ere, sailkatzearekin kontent egongo nintzateke. Oso zaila da txapelketa horretara iristea, baina hori litzateke nire helburu nagusiena.
