'Aztitza', bere azken liburua aurkeztuko du Oier Guillanek
Beste herri askoren artean, Errenteria-Oreretan eta Oiartzunen aurkeztuko du liburu berria Guillanek.
Aztitza liburu berria aurkeztuko du Oier Guillan idazlea, kazetari eta antzerkigileak datozen asteetan. Tartean, Errenteria-Oreretan eta Oiartzunen egingo ditu aurkezpenak errenteriarrak.
Hilaren 19an izango da aurkezpena Errenteria-Oreretan. Noski! liburu dendan 19:00etan hasita. Asier Sarasolarekin batera Barraskiloa piezaren irakurketa dramatizatua egingo du Guillanek, eta ondoren, 11 gonbidatuk galdera ezeroso bana egingo diote, liburu pieza banaren gainean.
Uztailaren 3an, berriz, Oiartzunen egingo du aurkezpena Post Etxea eta Ehuntzen espazioetan, 19:00etan. Ekitaldia Loaren defentsa piezarako Ananda Berasartek egindako argazkien proiekzio musikatuarekin hasiko du Post Etxean. Ainhoa Alberdik butoh dantzarekin lotuko ditu, ondoren, kaletik bi espazioak. Bukatzeko, Ehuntze espazioan egileak irakurketa dramatizatua egingo du, Imanol Ubedak sortutako Aztia antzezlaneko kanta batzuen bertsio akustikoez lagunduta.
Aztitza 11 antzerki pieza laburrekin ondu du Guillanek “enpatia politikoa” dela aldarrikatzeko. Susa-Ehazerekin argitaratu dua zken lan hori. Aurretik, Hura ez da lekua (Txalaparta, 2016) argitaratu zuen Asier Sarasola, Idoia Beratarbide eta Ander Fernandezekin batera. Poesiarekin jarraituz, Elkartasun basatia (2013, Susa), Hura ez da lekua (2012, Txalaparta), Eskuen sustraiak (2009, Susa), Ate hautsiak (2008, Arabako Foru Aldundia), Bakarrizketa poetikoak (2007, Bermingham), Erloju lehorrak (2005, Bermingham), kilimAmuak (2004, Mikelazulo-liburu kolektiboa), Bixotz Tam!padak (2002, Mikelazulo-liburu kolektiboa), Beste bat apalerako (2001, Mikelazulo-liburu kolektiboa), Gabeziak (1999, Bermingham), Begi bien sujauzia (1998, Mikelazulo).
Antzerki saileko Ero, ia (2017), Mr. Señora (2016, Txalaparta), Arra. Arraroa (2010, Artezblai), Herio heroi (2010, Artezblai), eta Munduko jakintsurik tontoena (2009, batBada) argitaratu ditu.
Zauri Bolodia (2018, Txalaparta), eta VHS (2020, Susa) eleberriak ere idatzi ditu.
