Pasaiako festei ongietorria emango diete hilaren 21ean
Pasaiako Udalak ekitaldi berezi bat egingo du San Pedroko Herriko plazan aurtengo jaiak aurkezteko, 12:00etan.
Uda gainean da, eta udarekin batera Pasaiako lau barrutietako festek eztanda egingo dute. Iaz irekitako bideari jarraituz, Pasaiako Udalak ekitaldi berezi bat antolatu du jaiei ongietorria emateko. Ekitaldi hori hilaren 21ean izango da, 12:00etan, San Pedroko Herriko plazan. Bertan lau barrutietako kultur arloko ordezkariak izango dira, eta udalak herritar guztiei dei egin die ekitaldian parte hartzeko.
Honakoa esan du Teo Alberro alkateak Pasaiako festen inguruan: “Jaiak ez dira barruti bakoitzarenak bakarrik. Herri gisa garenaren adierazpen kolektiboa dira. Ekitaldi honek batasun hori irudikatzen du, eta horregatik da hain berezia Pasaiarentzat”. Bestalde, Aitor Brion Kultura eta Ondare zinegotziak balioan jarri du hilaren 21eko saioa: “Ekitaldia berezia eta koloretsua izango da, baina baliotsuena hori lortzeko egindako bidea izan da: lau barrutietako elkarteak ideiak partekatzen, elkarrekin lan egiten, behetik eraikitzen… Hori ere kultura egitea da, eta, noski, herria herritik bertatik eraikitzea”.
Aurkezpenean Teo Alberro Pasaiako alkatea; Aitor Brion Kultura eta Ondare zinegotzia; San Pedroko Sorgiñarri txistulari taldeko Amaia Irulegi, Kizkitza Cabada, Arantza Zurutuza, Mari Carmen Ariz, Marivi Arrillaga eta Aitziber Zurutuza; San Pedroko Lamia dantza taldeko Larraine Lonbide eta Izar Iglesias; Illunbe Musika Bandako Fran Berra eta Pedro Etxaniz; Pasaiako Batelerak elkarteko Karmele Camara; Pasaiako Erraldoien Konpartsako Markel Oyarzabal; Antxoko dultzainero taldeko Jon Arrizabalaga eta Toñin Markina; Lintxua dantza taldeko Nerea Gartzia; eta Donibane txistulari taldeko Juanan Laboa.
Hilaren 21eko ekitaldia 12:00etan izango bada ere, 11:50ean erraldoi eta buruhandien kalejira egingo da, Pasaiako musika taldeek lagunduta. Kalejira Udal Aretotik (Erti) abiatuko da, eta Herriko plazara 12:00etan iritsiko dira. Herriko plazan, eta Pasaiako kultur taldeen eskutik, musika, dantza eta sorpresak egongo direla aurreratu dute antolatzaileek.
Pasaiako jaiak
- Hilak 23-24: San Juan.
- Hilak 26-30: San Pedro.
- Uztailak 4-8: Antxoko sanferminak.
- Uztailak 11-16: Trintxerpeko karmenak.
- Uztailak 24-31: Donibaneko santioak.
