PPAk portuko sarbideak hobetu ditu
Jarduketa horietan Lezoko eta Herrerako sarrerak hobetu eta gaur ireki dira. Proiektuarekin segurtasuna eta irisgarritasuna hobetu direla adierazi du PPAk.
Pasaiako Portu Agintaritzak (PPA) Lezoko eta Herrerako sarbide berriak sortu ditu, eta gaur ireki dira. Orotara, 1,5 milioi euro inbertitu ditu PPAk segurtasuna eta irisgarritasuna hobetzeko, dartsenaren bide komunikazioaren bi zutabeetatik.
Lezon egindako inbertsioak sarbideari beste errail bat eman diola nabarmendu du PPAk, bere edukiera handituz. Herrerako kasuan, sarbideen kokapen berriak, Aduana kalean aurreratuta, Herrera Sur eremua kontrolpeko esparru bihurtzea ahalbidetu du. Eremuko jarduerak aduana sailkapena hobe dezakeela adierazi du PPAk, portuak ahalmen operatibo handiagoa izan dezan.
“Birmoldaketarekin, Lezoko sarreraren edukiera hobetzen da, portuko sarbidea arinduko duen errei gehigarri batekin. Herrerako birkokatzeak, berriz, Herrera Sur aduanetan hobetzea ahalbidetzen du, portuko ohiko operadoreek asko eskatzen baitute”, baietsi du David Candelario PPAko zuzendariak.
Egin berri dituzten jarduketetan, PPAk sarbideak kontrolatzeko teknologia eguneratu du, zirkulazioa arintzen duten matrikulak ezagutzeko sistemak sartuta. Horrez gain, portuak aurreratu du laster ezarriko dela bisitak aldez aurretik web bidez egiaztatu ahal izateko funtzionaltasuna. Ute Accesos Pasaia Port enpresak gauzatutako eraikuntza proiektua iazko abuztuan hasi zen eta uztailean bukatuko da.
Antolamendu Plan Berezia
Ibilgailuentzako bi sarbideetako lanak Gipuzkoako Foru Aldundiak 2018an onartutako Pasaiako portuko zerbitzugunea antolatzeko plan bereziaren barruan kokatuta daudela jakinarazi du PPAk. Plan horrek aurrez egindako hainbat jarduketa ere biltzen ditu, hala nola: 2023an Herrera Mendebaldeko biltegietan inauguratutako plaza, PPAren eta aldundiaren inbertsioarekin eta urte berean arrantza lonjaren estalkian estreinatutako hirigintza espazioa, PPAk, aldundiak eta Eusko Jaurlaritzak finantzatuta.
