Musika eta dantza eskolako matrikulazio epea astelehenean irekiko da
Ikasle berriei begirako matrikulazioak hilaren 23an irekiko dira, 09:00etan. Hezkuntza eskaintza inklusiboa, askotarikoa eta adin mugarik gabekoa da.
Juanje Neira Pasaiako Udaleko Musika eta Dantza Eskolak ikasle berriei begirako matrikulazio epea irekiko du datorren astelehenean, hilaren 23an, 09:00etan. Izen emateak, ahal dela, Pasaia Musikalen webgunearen bidez egitea eskatu du musika eta dantza eskolak.
Juanje Neirako hezkuntza eskaintza inklusiboa, askotarikoa eta adin mugarik gabekoa dela adierazi dute zentroaren arduradunek. Musika eta dantza eskolako hezkuntza proposamena 3 urtetik aurrerako pertsonei begirakoa da. Prestakuntza eskaintzan musika klasikoko zein modernoko instrumentu eta ahots espezialitate guztiak egin daitezke, interes, maila eta ibilbide guztietara egokituta daudenak. Horrez gain, taldeko irakasgaiak eta teoriko praktikoak egiten dituzte, esaterako, musika hizkuntza, harmonia, instrumentu eta ahots taldeak edota konboak. Euskal Dantza ere hezkuntza eskaintzaren parte da, adin eta maila ezberdinei zuzendutako klaseekin, herri kulturaren ezagutza eta transmisioa sustatuz.
2025-2026 ikasturterako, gainera, bi proposamen berri txertatu dituzte proposamenetan. Alde batetik, 3 urteko haurrei begirako musika hezkuntza goiztiarra egin ahal izango da. Gazteenei begirako jarduera horretan, mugimenduaren eta elkarreraginaren bidez, musikarako hastapen ludiko eta bizipenezkoa jorratuko da. Bestalde, musika ekitaldiak soinuztatzeko eta grabatzeko ikastaroa txertatu dute jardueren zerrendan. Proposamen horretan zuzeneko soinua, mikrofonia eta musika grabazioa ikasi nahi dutenei oinarrizko prestakuntza teknikoa emango zaie.
