Sardina postuak jartzeko eskaerak egin daitezke
Uztailaren 27an San Pantaleon eguna ospatuko da Donibanen. Sardina postuak jartzeko eskaerak aurkezteko epea hilaren 23tik uztailaren 7ra bitartean izango da.
Uztailaren 27an San Pantaleon eguna ospatuko da Donibanen, eta, ohi bezala, sardina postuek barrutiko kaleak beteko dituzte. San Pantaleonen sardina postua jarri nahi dutenek inprimaki bat aurkeztu beharko dute Pasaiako Udalaren erregistroan edo udalaren online tramiteen atarian. Eskaerak aurkezteko epea hilaren 23tik uztailaren 7ra bitartean izango da, biak barne.
Postua jartzeko eskaeran honako datuak zehaztu beharko dira: eskatzailea nor den, postuaren kokaleku zehatza, zer material behar duten eta zenbat sardina kutxa nahi dituzten. Eskatzaile bakoitzak ikatz zaku bat jasoko duela aurreratu du udalak.
Eskaerak aurkezteko epea bukatu ondoren eta aurreko urteetan egin bezala, izena eman duten kuadrillen artean zozketa egingo da, eta bi kuadrilla aukeratuko dira San Pantaleon egunean sardinak banatzeko. Hautatutako bi kuadrillek arduradun bana izango dute banaketa egiteko.
Udalak nabarmendu du hilaren 23tik uztailaren 7ra bitartean izena ematen ez duten kuadrillak ez direla banaketa zerrendan sartuko, eta, hortaz, ez dutela sardinarik jasoko.
