"Bueltan gea"
'Bueltan gea' lelopean, 1990eko hamarkadan gazte izan zirenek festa eguna egin zuten larunbatean. Antolatzaileak, pozarren.
Bueltan Gean izan zirenak, talde argazkian.Eñaut Beristain Beste egun berezi bat, larunbatean, Lezon. 1990eko hamarkadan gazte izan zirenek (egun baino gazteago ziur zirela XX. mendeko azken hamarkadan) festa eguna izan zuten, “bueltan gea”, esan zuten. Esaldi motz eta oso esanguratsu horren-pean antolatu zituzten larunbatekoak. “Gazte izandakoak bueltan gara. Itzulera antzekoa izan zen larunbatekoa. Esan nahi genuena zen herrian garai batean eragile izan ginela, eta egun ere antolatzeko gai garela, herriari ekarpena egiteko prest gaudela”, zehaztu du antolaketa taldean izan den Eñaut Beristainek. Eskerrak eman dizkiete antolatzaileek egunean era batera edo bestera laguntza eman zutenei.
Aurpegiko zimur, ile urdin, edo ile gutxiko buruez gaindi, ezaugarri berezi izan zuten partaideek: elastiko berdeak. Lezoko kolorea. Mezu nagusi bat nabarmendu dute antolatzaileek: “Batzuei otu zitzaigun hau egitea. Baina garrantzitsua izan da guretzat esatea herria bizirik dagoela, eta gu ere eragile bagarela. Gazteek euren gauzak egiten dituzte, eta guk beste alde batetik ekarpena egiteko aukera izan dugu. Herri bizia da Lezo, beti badago zerbait herriko elkarte eta eragileei esker. Auzolanean egiten dira denak. Berriz ere esan nahi dut: herri bizia dugu, eta gu ere horren zati gara”.
Eguna nola mamitu zen jakiteko iazko Piztu Lezoren Gazte Egunera atzera begirada egin du Beristainek. Santakrutzen aurreko asteburuan izan zen egun hura, eta herriko gazteenak herria girotzen ikusita, hark eta harekin zeuden lezoar pare batek erabaki zuten garai batean gazte izandakoek ere badutela zer esan oraindik, eta “zergatik ez dugu egingo” ideiatik, bueltan gea-ra jauzia egin zuten. Esandakoa egitera. Martxo aldera hasi ziren biltzen hasierako ideia izan zutenak nahiz bidean batu zitzaizkien hainbat egunari izaera emateko, 8-9 pertsonako lantaldeak hartu zuen antolaketaren pisu nagusia. “Lan asko egin dugu eguna prestatzeko. Mimo handiz egin dugu lan”, zehaztu du lezoarrak.
Larunbat goizean, muntaketa lanak egin ondoren, bildu eta egunaren izaeraren berri emateko ekitalditxoa egin zuten. Ondoren txaranga-poteoarekin herria girotu, eta garai bateko herri olinpiadak oroitzeko jolasak egin zituzten. Ondoren, bazkaria: 300 lagun bildu ziren Karlos Saldisen. Otorduan, herriko ahotsak: Iñaki Labakak, Lorea Intxaurrandietak eta Ibon Salaberriak, lezoar abeslari ezagun eta 1990ko hamarkadan gazte izandakoek, kantaldia egin zuten. Ondoren, DJaren txanda, eta nahasteko, elkartzeko, besarkatzeko tartea. “Asko izan ginen, baina falta zen jendea ere izan zen”, zehaztu du Beristainek. Abestien playlist-a ere egin zuten egunean zehar kanta horiek jartzeko; ziur ez zela reggaetoirik izan. Gainera, garai bateko gazte olinpiadetako nahiz desfileetako irudi eta bideoak berreskuratu, eta horiek taldean ikusi zituzten, “zeharo hunkitu ziren asko. Herrian ez dauden asko, edo gazte ginenekoak ikustea sekulakoa eta oso polita izan zen”.
Zapore gozoa
“Sortu nahi genuen energia hori lortu genuen. Jendeak elkar konektatu zuen”, baietsi du lezoarrak, “oso ondo sentitu ziren han izan zirenak”. 2026an ere Bueltan Gea eguna izango ote den galdetuta, “ez dut uste” batekin erantzun du Beristainek, “Olinpiar Jokoak bezala lau urtero ez, baina agian hiru urtean behin egingo dugu antzeko zerbait. Ikusiko dugu”.
