Sanjoanak, abiadura bizian
Atzo hasi ziren Pasaiako lehen festak, Donibaneko sanjoanak. Alkate txikiek egin zieten harrera herritarrei sua piztu baino lehen.
Atzo hasi ziren Donibaneko sanjoanak. Azkar batean hasi, eta ia berehala bukatuko diren festak izango dira, atzotik gaurrerako bidea egingo dutelako. Edonola ere, egun seinalatuak dira Donibanen eta Pasaian. Barruti arrosan, haren izena duten festetan daudelako; Pasaian, udalerriko udako lehenak direlako eta 40 eguneko jai giro aro baten hasiera izan direlako. Abiadura bizian hasi ziren atzo Donibaneko udako lehen festak.
Atzo, lehenik, buruhandiek erratz lana egin zuten, Meipitik plazarako bidean herritarrak (haurrak batez ere) eraman zituztelako Donibane kale oso-osotik. Han, hasiera ofiziala: Enara Escribano Camara eta Julen Baquero Salaberria alkate txikiek irmo hartu zuten agintea iazko alkate txikien eskutik, Garazi Arregiren eta Aratz Lopetegiren eskutik hain zuzen ere. Joan den urteko agintariek adierazi zuten egun bereziak direla egunotakoak, Euskal Herri ia osoan ospatzen delako San Juan eguna eta haren bezperako su-festa; gainera, uda abian dela ere ofizialki iragartzen dute. “Bota ditzagun sutara lehia eta zati txarrak, eta ez sorginak. Izan ere, Jaizkibelen magalean bizi garenok sorginak gogoko ditugu, gure kulturaren parte direlako”.
Azalpenen ondoren, bertso sorta eskaini zieten herriko gazteek, binaka, Santiago plaza girotzen izan ziren sanjuandar eta bisitariei. Lintxua taldeko dantzariek Agurra dantzatu, eta aurtengo alkate txikiek ofizialki hasitzat eman zituzten sanjoanak. Gauean, Salbearen ondoren, suaren inguruan dantzara eta uda giroaz gozatzera batu ziren barrutiko biztanleak. Gaur, San Joan Eguna da.
Jarraian, atzoko sanjoanen hasierako ekitaldiaren hainbat irudi eta bideoa. Beherago, gaurko ekitaldien zerrenda.
Donibaneko sanjoanak. Gaurko (hilak 24) egitaraua
- 10:00: Diana txistulariekin herriko kaleetan zehar.
- 11:00: Haur eta gazteen danborrada Meipitik plazara.
- 11:30: San Joan eguneko meza. Ondoren, hamaiketakoa.
- 17:00: Txokolatada, jolasak eta buruhandiak Santiago plazan. Ondoren apar festa leku berean.
