Trafiko eta aparkaleku aldaketak sanpedroengatik
Hilaren 26tik 30era bitartean, San Pedroko jaiak ospatuko dira, eta festek eragina izango dute barrutiko trafikoan eta aparkalekuan.
Sanpedroak lehertzear dira. Aurtengo festak hilaren 26tik 30era bitartean izango dira, eta ospakizunek trafiko eta aparkaleku aldaketak ekarriko dituzte barrutira. Hilaren 26tik aurrera ibilgailuak ezin izango dira sartu Arraunlari kalera, Torreatze kalera eta Ondartxo pasealekura. Salbuespen moduan, goizean eta gauean, ekitaldiak bukatu ondoren, bertakoei, mugikortasun urriko pertsonen txartela duten ibilgailuei eta zamalanak egin behar dituztenei sarbidea baimenduko zaie.
Zehazki, honakoa da Pasaiako Udalak egin duen ordutegien aurreikuspena: hilaren 26ko 14:00etan errepidea itxiko da, eta hilaren 27an, 28an eta 29an, 10:00etatik aurrera eta egun osoan zehar, errepidea itxita egongo da. Udalak adierazi du ordutegi horiek gutxi gorabeherakoak direla, eta Udaltzaingoak aldatu ditzakeela trafiko eta segurtasun arrazoiengatik.
Aparkalekuei dagokienean, hilaren 26ko 08:00etatik uztailaren 1eko 08:00etara bitartean, ezin izango da aparkatu Arraunlari eta Torreatze kaleetako balizatutako guneetan. Gainontzean, soilik bertakoen txartela edo mugikortasun urriko pertsonen txartela duten ibilgailuek aparkatu ahal izango dutela jakinarazi du udalak.
Aparkaleku gabeziari aurre egiteko, Hospitalilloko kaiaren bukaerako eremuan (San Pedroko lonjaren sarreratik gertuen dagoen eremuan) aparkatzeko gunea irekiko da. Zehazki, hilaren 26ko 13:00etatik hilaren 30eko 18:00etara bitartean egongo da erabilgarri, eta sarrera Esnabideko barreratik egin beharko da. Festek irauten duten bitartean, Hospitalilloko bertakoen aparkalekuan ere aparkatu ahal izango dute San Pedroko bertakoen txartela duten ibilgailuek.
Aldaketek eragindako eremuetako bizilagunei, udalak gomendatu die beren ibilgailuak erabili behar badituzte, eremu horietatik kanpo eta egokitutako aparkalekuetan aparkatzea. Horrez gain, Pasaiara datozen bisitariei garraio publikoan bertaratzeko eskaera luzatu die udal erakundeak, aparkaleku eta mugikortasun arazoak handiagotu ez daitezen.
