Asteburuan, San Pedro irabazle
Oparo joan da sanpedroen asteburua. Besteak beste Artzain eta Inudeen desfileak, eta San Pedro-Antxo desafioa izan dira.
Oparoa izan da sanpedroen asteburua. Eguraldiak asko lagundu du (gehiegi agian), eta horrek ahalbidetu du kalea oinarri duen egitarauaren jarduera guztiek agertoki egokiena izatea. Artzain eta inudeen desfileak (larunbatean haurrena; igandean helduena), desafioa, Porrusalda Txaranga, herri afaria, musika, pilota… Asteburu biribila izan da. San Pedrok irabazi du; giroan, eta desafioan. Larunbatean herriko taldeak Antxo mendean hartu zuelako herri kirol desafioan, iaz Donibanekoekin egin bezala.
Gaur bukatuko dira 2025eko San Pedroko festak. Goizean kirol jardueretan ari dira gazteenak (geroago zabalduko ditu horren kronika eta irudiak HITZAk), eta arratsaldean, erraldoi eta buruhandien ondotik, artisten txanda iritsiko da Goazen Nait-ekin (18:00etan, frontoian). Ondoren arratsalde pasa egiteko aukera, dantzan, Modestorekin (20:00-22:30) frontoian, eta afari autogestionatuaren ondotik festei agur esateko zezensuzkoaren txinpartak herritik (22:30).
Jarraian, hitzen balio askoz handiagoa duten irudiekin sanpedroen asteburuko laburpena, hainbat herritarrek HITZAra bidalitako argazkiei esker. Eskerrik asko haiei guztiei!
