Iazko arantza kendu du Ander Iñarrak, Goierriko Bi Handiak irabazi du
Iaz bigarren izan zen proba horretan lezoarra. Ekaitz arriskuagatik aldaketak izan dira ordutegian, eta lasterketaren zati gehiena gauez egin behar izan dute.
Iñarra, helmuga zapaldu berritan.Loinaz Agirre / Goierriko Hitza Iazko arantza kendu du Ander Iñarra mendiko lasterkari lezoarrak Goierri aldean. Goierriko Bi Handiak-en (G2H) gizonen lasterketa irabazi du asteburuan, 90 kilometrokoa. Larunbateko 19:00etan abiatu zen lasterketa Beasaindik, eta igandeko 05:50 inguruan bukatu zuen proba Iñarrak han bertan: 10.42.53ko denbora egin zuen txapela bere egiteko. Mikel Intsausti beasaindarra (11:09:49) izan zen bigarren, eta hirugarren Aitor Zunzunegi legorretarra (11:22:29).
Aurtengo G2Hk ordutegian aldaketa izan du, ekaitz arriskuagatik. Helmugan Goierriko Hitza-ri egindako adierazpenetan, horrek eragina izan zuen korrikalariengan. Ander Iñarraren esanetan, ordu aldaketak “zaildu” egin zuen G2H proba. Iaz bigarren egin zuen Iñarrak eta proba ezagutzen zuen, baina aitortu zuenez, ordutegi aldaketarekin “asko-asko” aldatu zen lasterketa. Iaz, bigarren izan arren, askoz denbora hobea egin zuen (10.15.30). Hala, egun argitan hiru ordu bakarrik egin zituzten korrikalariek, beraz, lasterketa gehiena gauez izan zen. Horrek bereziki zaildu zuen proba. Lizarrustitik Etzegaratera bitartean ere lainoa izan zuten, “laino itxia, metro bat edo bi bakarrik ikusten zen, eta ezin korrika lasai egin. Ezin hankak luzatu, eta horrek muskularki gehiago nekatzen du”
Etzegaratetik aurrera hobeto jarraitu zuen lezoarrak. “Hala nola igo dut Aizkorri, baina Aizkorriko jaitsiera ere gauez zen, bestetan egunez egiten da, eta asko aldatzen da. Irristakorra zegoen, kontu gehiagorekin ibili behar da, nekea daramazu… Eta Andraitzetik behera beste horrenbeste. Horregatik atera da denbora hau”.
Sasoiko helburuen artean gorriz markatua zuen Iñarrak G2H. Baldintza ez oso egokiak izan arren, txapela lortzearekin helburua bete eta iazko arantza kendu du.
