Auzo konpostarekin 14,25 tona organiko kudeatu dira Lezon
Lezon auzo konposterako bost gune daude, eta 71 familia erabiltzaile. Hondakinen tasan %40ko hobaria dute auzo konposta egiten dutenek.
Arretxeneko gunea da herriko bostetako bat.Lezoko Udala Hondakin organikoak kudeatzeko baliabideak esku-eskura dituzte lezoarrek. Edukiontzi sistemako marroiaz gaindi, auzo konposta programa abian da herrian duela hainbat urtetatik. Osotara auzo konposta egiteko bost gune daude herrian: Altamirakoa, Andreonekoa, Aralar kalekoa, Arretxenekoa eta Lopenekoa. Iazko uztailetik aurtengo ekainera 14,25 tona hondakin organiko kudeatu dira bost gune horien bitartez, eta eguratsera 9,08 tona CO2 isurtzea ekidin da. Organikoak zuzenean kudeatzeko aukerara batzeko eskatu die udalak lezoarrei. Hondakinen udal tasan %40ko hobaria dute auzo konposta egiten dutenek
Ekainaren 26an egin zuen Lezoko Udalak, Vermican zerbitzuaren enpresa kudeatzailearen gidaritzapean, azken ikasturtean Lezoko auzo konpostaren egitasmoak lortutako emaitzen berri emateko batzarra. Erabiltzaileei nahiz herritarrei zabalik izan zen topagunea. Datu zehatzak emateaz gain, bertan izan ziren herritarren ekarpenak ere jaso ziren, zerbitzua hobetze aldera. Hala, Vermicanek emaitzen ondorio kuantitatibo eta kualitatibo baikorra egin zuen, «kanpaina arrakastatsua izan da erabat». Lezon 71 familiak egiten dute auzo konposta. Kopuru hori handitzeko saiakera egiten ari da udala, eta zentzu horretan informazio eta sentsibilizazio kanpainak egin ditu.
Kudeatutako 14,25 tonetatik, kalitate oso handiko 4,4 tona konpost lortu direla azaldu zuten ekainaren bukaerako bilera horretan, eta hori udal zerbitzuei (lorezainei, adibidez) nahiz herritarren artean banatu zaiela. Hala, lezoarrek zuzen-zuzenean jaso dituzte herriko bost auzo konposta guneen emaitzen onurak.
