«Madalenetan nire aletxoa jartzea plazera izan da»
Asier Jaraiz Lopez lezoarraren Begietara begira kartelak iragarriko ditu aurtengo madalenak. Oso harreman estua du Oreretarekin, eta pozarren da jaien irudia harena delako.
Asier Jaraiz Lopez lezoarraren Begietara begira kartelak iragarriko ditu aurtengo madalenak. Oso harreman estua du Oreretarekin, eta pozarren da jaien irudia harena delako, madalenak oso festa bereziak baitira bere familian. Aurtengo kartel lehiaketan talentu handia dagoela ikusi du, eta jendea parte hartzera animatu du, artistak eta diseinuak bidean ez geratzeko.
Zer da zuretzat Madalen Jaiak iragartzea?
Oso harreman estua daukat Oreretarekin. Aita hangoa da, eta amona eta izeba ere bertan bizi dira. Oso gertukoa izan dut beti Orereta. Lezo eta Orereta ondoan daudenez, txikitatik joan gara jaietara, eta madalenak beti oso-oso jai bereziak izan dira guretzako. Duela 15 urte hartu nuen parte lehen aldiz madalenetako kartel lehiaketan. Ez dut urtero parte hartu, baina bai noizbehinka. Aurten, sorpresaz, lanean nintzela, Kultura Sailetik deitu ninduten eta esan zidaten txapelketa irabazi nuela. Oso pozik nago. Familiarentzat ere oso berezia izan da. Gertukoak eta horren potenteak diren jaiak izanik, nire aletxoa jarri ahal izatea plazera izan da.
Zein da kartelaren esanahia?
Argazkilaria ere banaiz, eta iazko madalenetan, kaletik nindoala, erraldoien kalejira topatu nuen. Udaletxera sartzear ziren, azken dantzak egiten. Xanti eta Maialen parez pare ikusi nituen eta argazkia atera nien. Txikitatik erraldoi eta buruhandiak gustuko izan ditut, eta argi nuen argazki polit horretatik zerbait egin behar nuela. 2025eko lehiaketarako erabili dut. Enkoadraketa egin, filtroak sartu, kolorea jarri eta modu oso natural eta azkarrean atera zitzaidan diseinua. Oso irudi polita iruditzen zait Xanti eta Maialen parez pare egotea, begietara begira.
Hortaz, iaz ateratako argazki batetik sortu duzu kartela.
Bai, hori da. Izena ere ez da buruhauste handia izan, Begietara begira jarri baitiot. Begietara begiratzeak elkartasuna, maitasuna, gertutasuna edota konplizitatea bezalako kontzeptuak iradokitzen dizkit, eta kontzeptu horiekin lotu nahi izan dut kartela. Jaietan jendeak poztasuna du eta momentu politak bizitzen dira lagunekin, familiarekin edota herritarrekin.
Horrez gain, 2011n Vendetta taldeak Begietara begira izeneko abestia argitaratu zuen, eta euskararen aldarrikapenaz eta babesaz hitz egiten du. Abesti horri ere keinu egin nahi izan diot. Euskal Herrian bizi gara eta gure jaiak euskaldunak izatea eta euskaraz bizitzea ere garrantzitsua da.
Nondik datorkizu kartelak eta mota horretako lanak sortzeko zaletasuna?
Txikitatik asko marraztu dut eta eskulan asko egin ditut. Diskoen portaden oso frikia ere banaiz. Beti gustatu izan zait irudia zentzu guztietan. Lagunek proiektu bat baldin badute laguntza eskatzen didate portada edo poster bat diseinatzeko. Betidanik gustatu izan zait sortzea, eta oso saltseroa naizenez, madalenetako lehiaketan parte hartzea erabaki nuen duela 15 urte. 15 urte geroago madalenen portada nirea izango da.
Madalenetakoaren ondoren, baduzu beste erronkarik jomugan?
Gauza asko uztartzen ditut, eta pixkanaka joaten naiz. Etorkizunera begira gauzak suertatuko dira, baina oraingoz ez daukat planifikatuta zer egingo dudan. Hurrengo urtean seguruenik berriro hartuko dut parte madalenetako lehiaketan. Gainontzeko lanak ikusita, oso onak izan dira eta sekulako talentua dago. Eskerrak eman nahi dizkiet parte hartzaile guztiei, duten talentuagatik eta beren aletxoa jartzeagatik. Jendea ere parte hartzera animatuko nuke, beldurrik gabe. Seguruenik ezkutuan artista pila daude, eta etorkizunean diseinu pila topatuko ditugu. Asko bidean geratzen dira, eta pena da, baina ikusten dut sekulako potentziala dagoela, eta gazteen artean, gaur egun, are gehiago.
