'Eromeria' Erromeria Egunean
Mende laurdenaren Erromeria Eguna egiten ari dira gaur Errenteria-Oreretan. Eguraldia lagun, goizean giro aparta herrian.
Gaur, Ereintza Dantza Taldearen eskutik eta laguntzaile askorekin, Erromeria Eguna Errenteria-Oreretan. Eromeria zentroko kaleetan dantzarien, musikarien, herritarren eta nahi duten denen ilusio eta irribarrearekin. Erromeria giroa euskal kulturaren ondare ukiezina baita, eta herriak hala ulertua duelako, aurten 25.enez ari dira egiten dantzaren bitartez festa giroa kalera ateratzeko topagunea. Astelehenean hasiko dira madalenak. Festen atarikoen artean jada erreferentzia da Ereintzaren proposamena.
Eguraldi aproposa. Ezinbesteko osagaia Erromeria Eguna eta kalean egiten diren guztiak egokiago atera daitezen. Halakoa izan da goiza. Baina ez da dantzara mugatu egunaren lehen zatia. Izan ere, Foru plazan bola jokoan izan dira Gipuzkoatik etorritako hainbat herritako kideak, punteria finarekin biribilkia bota eta egurrezko zutabetxoak botatzen. Herritarrek Xenpelar plazan bola-makil talka konpetizioa ikusten zuten bitartean, hamaiketakoarekin ari ziren Koldo Mitxelena plazan dantzariak eta musikariak. Giroa sortzeko, gorputza ere girotu behar baita.
Indartu ondoren, indarra kaleetara. Erromeria ibiltaria egin dute eguerdian zehar dantzarien segizioko kideek, txistulariekin. Dultzaineroak ere kalean ziren, baita joaldunak ere. Eguerdikoak Gamon Zumardian bukatu dituzte dantzaldi kolektiboarekin. Pozaldi kolektiboa ere sorrarazi dute tabernen terrazetan zeudenen artean. Goizekoak eginda, bazkaltzera joan dira denak Merkatuzarrera.
Arratsaldean badira Oreretako 2025eko Erromeria Egunaren barruko jarduera eta ekitaldi gehiago. Beheko zerrenda urdinean horien berri. Jarraian, goizeko giroaren argazki sorta eta bideoa.
2025eko Erromeria Eguna. Arratsaldeko egitaraua.
- 17:00. Bixkor txaranga, Merkatuzarren hasi eta herriko kaleetan zehar.
- 17:30. Txistulari, trikitilari eta dultzainajoleak, Zumardian.
- 18:30. Patxi Perez eta konpainiaren dantzaldia Zumardian.
- 22:30. Gabezin erromeria Agirre Lehendakariaren plazan.
