Xanistebanak bukatzeko, Arkume jana
684 lagun bildu ditu aurten Ardi Latxa elkarteak antolaturiko arkume jateak. Bazkarian Oiartzun euskalduna izaten jarraitzeko aldarria egin dute.
Atzo bezala, gaur ere laranja kolorez bete dute Oiartzungo Doneztebe plaza. Kasu honetan, ordea, helduak izan dira bazkari eder batez gozatzera gerturatu direnak. 684 lagun bildu ditu aurten Ardi Latxa elkarteak antolaturiko arkume jateak.
Bazkaltzen hasi aurretik, Kontzejupeko Pilota Txapelketaren lekuko izan dira sabelak betetzeko prest gerturatu diren oiartzuarrak, eta Arkumea eta paella kozinatu bitartean egin dute sari banaketa. Maila bakoitzeko bikote garaileak banan-banan deitu eta talde argazkia egin dute ondoren, parte hartzaile guztiekin.
Segidan, helduen bazkarirako mahaiak, aulkiak eta beharrezko guztiak jartzeari ekin diote eta antolatzaileek bozgoragailuetatik adierazitako ordenan eseri dira kuadrillak. Gaurko menua urteroko berbera izan da: arkumea, paella eta sagar tarta.
Oiartzun euskalduna
Ardi Latxa elkarteko kideek 15:00ak aldera azaldu dute jana hartzeko jarraitu beharreko prozedura, eta jarraian Beñat Trigori eman diote hitza. Trigok bertsoa bota eta euskararen aldeko aldarria egin du.
UEMAren enkarguz SIDECOK eginiko azterketa baten datuak eman ditu lehenik: “2036rako ez da egongo udalerririk euskararen erabilera %80tik gorakoa izango duenik, eta %60tik gorako erabilera dutenak, %0,2a besterik ez da izango. Hau da, 10 urtera ez da ia arnasgunerik egongo Euskal Herrian”.
Oiartzun ere joera horretatik salbu ez dagoela ohartarazi du Trigok, eta horren aurrean euskaraz hitz egiten, euskaraz harremantzen, euskaraz gozatzen eta euskaraz parranda egiten jarraitzeko eskatu die bertaratu direnei. Azkenik, Kontseiluak abenduaren 27rako antolatu duen ekitaldian parte hartzera gonbidatu ditu herrikideak. Bilbon izango da hitzordua.
Garko egitaraua:
- 16:00-20:00 HAUR ETA GAZTEENTZAKO PARKEA, Haurtzaro Ikastolan.
Antolatzailea: Haurtzaro Ikastola - 16:30 Xanistebanetako 28. TRUK TXAPELKETA, Madalensoro
pilotalekuan. Antolatzailea: Oiarpe KE - 18:30 Haurrentzako TXOKOLATADA, Haurtzaro Ikastolan.
Antolatzailea: Haurtzaro Ikastola - 23:00 Elizaldeko kaleetan zehar, ZEZENSUZKOA ibiliko da,
Lartaun Txistulari Taldeak Idiarena doinuz lagundurik - 23:30 Musika Jaialdia, Done Eztebe plazan.
BIDE BATEZ
Antolatzaileak: Musika Batzordea
