"Une zoragarri eta hunkigarriak bizitu ditugu"
Aurtengo xanistebanen gaineko balorazio "oso positiboa" egin du udalak. Joana Mendiburu alkateak oiartzuarrei eskerrak eman dizkie, "auzolanerako erakutsitako borondateagatik".
Joana Mendiburu alkatea, aurtengo xanistebanetan. Aurtengo xanistebanen gaineko balorazioa egin du Oiartzungo Udalak. Hedabideekin partekatu duenaren arabera, “jai ederrak” izan dira aurtengoak eta erakundeak balorazio “oso positiboa” egin du, “bai antolaketa aldetik baita herritarren parte hartzearen aldetik ere”.
“Une zoragarri eta hunkigarriak bizitu ditugu. Egunez zein gauez alaitasuna nagusitu da eta herritar ugarik hartu du parte jai batzordeak antolatutako ekinaldietan”, diote udaleko iturriek. Herriko jaiak “topaleku” izan direla erantsi dute, “lagunak eta familiak elkartzeko aitzakia, baita lagun berriak egitekoa ere”. Ez dela inolako eraso matxista edo arrazistarik izan nabarmendu nahi izan du erakundeak.
Bide batez, “festak antolatzeko auzolanean buru-belarri” aritu direnei eskerrak eman dizkie Joana Mendiburu alkateak: “Jai batzordeko kideek 80 ekintza baino gehiago antolatu dituzte eta guzti-guztiak egin dira, inolako ezbehar edo ezustekorik gabe. Eskertzekoa da udaleko langile eta kale garbitzaileek egindako lana, eta bereziki azpimarratzekoa, beste behin ere, oiartzuarrek auzolanerako erakutsitako borondatea. Jaiak ez lirateke inolaz ere direnak izango ekintzak antolatzeko eta txosnetan lan egiteko prest dagoen herritar multzo handi hori gabe. Bejondeizuela eta eskerrik asko modu batera ala bestera zuen alea jarri duzuen guztiei! Gora jai herrikoiak!”.
