Amona mantangorriak, erretxina desagerrarazteko
Kontrol biologikoa deritzon teknika erabiliko du beste urte batez udalak Zubitxo kaleko ezkiek askatzen duten erretxina desagerrarazteko.
Zubitxo kaleko ezkiek zorrien ondorioz askatzen duten erretxina desagerrarazteko amona mantangorriak askatu berri ditu Lezoko Udalak. Ezkiek zorriak hartzea oso ohikoa dela gogorarazi du erakundeak, eta hori ematen denean, zuhaitzek erretxina askatzen dutela, eta ondorioz, ingurua zikintzen dutela. Autoetan, altzarietan, kalean… Edonon itsasten da erretxin hori, kalteak eraginez bizilagunei.
Horrelako egoeretan zorriez elikatzen diren intsektuak askatzen direla diote udaleko iturriek. Zubitxon, hain zuzen, Adalia Bipunctata espezia askatu dute. Landare zorriz elikatzen dira hauek, eta plaga “kontrolatu” egingo dutela dio udalak. Kontrol biologikoa deritzo teknika honi. “Ez da produktu kutsakorrik ezta ingurumenerako kaltegarria den beste metodo inbasiborik erabili behar”.
Hirugarren urtea da udalak metodologia hau erabiltzen duela. Hasi zirenetik, kontrol biologiko honen eragina “oso nabaria” izan dela dio erakundeak, “azken urtean ia ez baita erretxinarik egon eta ez baita kalterik erregistratu”.
