Poesia Egunen bazkarirako txartelak eros daitezke
Ergoien-Ergoien ibilaldi poetikoa antolatu dute irailaren 6rako. Hura bukatuta bazkaria egingo dute Auzokalten; asteazkenera arte erreserba daiteke.
Iazko ibilaldi poetikoko irudia. Aurtengoa Ergoienen izango da. Irailaren 5etik 11ra bitartean Poesia Egunak izango dira Oiartzunen. Hainbat ekitaldi antolatu dituzte egun horietarako, eta horietako bat izango da ibilaldi poetikoa.
Aurtengo ekitaldian Ergoien auzoa izango da kokalekua. 11:00etan hasiko da ibilaldia; auzo horretan hasi eta bukatuko da.
Poesiarekin gozatu ondoren, bazkariarekin gozatzen jarraitzeko aukera izango dela jakinarazi dute antolatzaileek. Ergoiengo bertako Auzokalte elkartean izango da bazkaria.
Menuaren berri eman dute: entsalada, lasagna eta izozkia. 10 euroko prezioa izango du. Mahai horren bueltan bazkaldu nahi duenak aldez aurretik egin beharko du erreserba, posta elektroniko bidez. Asteazkenera arte egin daiteke eskaera.
Sukaldeak, finkatuta
Irailaren 8, 9 eta 10erako Poeta bat zure sukaldean programatu dituzte. Poeta bana hurbilduko da egun bakoitzean; honakoak dira, hurrenez hurren: Jose Luis Otamendi, Harkaitz Cano eta Itziar Ugarte. 19:00etan hasiko dira errezitaldiak. Izena eman beharko da lehenago, e-posta bidez.
Herritarrei dei egin zieten etxeko sukaldea utz zezaten. Horiek lortuta, haien kokalekuen berri eman dute antolakuntzakoek:
- Irailaren 8a, astelehena: Jose Luis Otamendi, Done Eztebe plaza 12 2Bn.
- Irailaren 9an, asteartea: Harkaitz Cano, Iradi bidea 16 eskuinean.
- Irailaren 10ean, asteazkena: Itziar Ugarte, Arraskuelarre kalea 10, 2. ezkerrean.
