Aisialdiko begirale titulua egin ahal izango da Pasaian
Ikastaroa urriaren 18tik ekainaren 6ra bitartean izango da. Izen emateak hilaren 10etik 30era bitartean egin behar dira.
Pasaiako Udalak aisialdiko begirale ikastaroa egiteko aukera eskainiko die pasaitar gazteei. Ikastaroa abiatzearen helburua da haur eta nerabeen aisialdirako jardueretarako hezitzaile euskaldun eta kualifikatuak izatea, udalaren eta herriko eragileen beharrei erantzuteko. Hezten elkarteak emango du begirale izateko ikastaroa, eta bukatu ondoren, Haur eta Gazteen Aisialdirako Begirale izeneko titulua lortuko dute parte hartzaileek. Titulu hori, gainera, Eusko Jaurlaritzak homologatutakoa du.
Ikastaroa euskaraz izango da, eta 150 ordu teoriko eta 160 praktiko izango ditu. Saioak Trintxerpeko Udal Euskaltegian izango dira, urriaren 18tik ekainaren 6ra bitartean, larunbat goizetan, 09:00etatik 15:00etara. 2026ko urtarrilaren 31ko eta otsailaren 1eko asteburuan asteburu pasa egingo dute parte hartzaileek.
Ikastaroa doan izango da pasaitarrentzat. Pasaiako haur eta nerabeekin lan egiten duten elkarte edo udal zerbitzuren bateko kide diren gazteei ere begirakoa da ikastaroa, nahiz eta pasaitarrak ez izan. Izen emateak hilaren 10etik 30era bitartean egin behar dira, Hezten elkartearen webgunearen bidez. Udalaren webgunean ere ikastaroaren gaineko xehetasunak aurki daitezke.
