Instalazio fotovoltaiko bat jarri dute Karmengo Aman
173 modulu jarri ditu udalak Trintxerpeko ikastetxeko eraikinaren teilatuan, eta bertan sortutako energia hainbat eraikinetan kontsumituko da.
Pasaiako Udala energia iturri berriztagarrietan oinarritutako energia trantsizioa bultzatzen eta hobetzen ari da. Bide horretan, instalazio fotovoltaiko berri bat jarri du udalak Trintxerpeko Karmengo Ama ikastetxeko eraikinaren teilatuan.
Orotara, 495Wp potentziako 173 modulu jarri dira eraikinaren teilatuan. Panel horiek 33kWko bi inbertsoretara konektatuta daude, eta urtean 88.422kWhko energia sortuko dutela aurreikusi du udal erakundeak. Udalak energia hori elkarbanatu egingo du, eta Karmengo Aman sortutako energia hainbat eraikinetan kontsumituko da. Besteak beste, Arizabalon, Zerbitzuetako pabiloian, Gizarte Ekintzetako bulegoetan edota Udal Euskaltegiaren eraikinean kontsumituko da energia hori.
Energiaren Euskal Erakundeak (EEE) 51.436 euroko diru laguntza eman dio udalari instalaziorako. Trintxerpen gauzatu berri den proiektuak Energia iturri berriztagarrien bidezko autokontsumo eta biltegiratzearekin eta bizitegi sektorean sistema termiko berriztagarriak ezartzearekin lotutako pizgarri programaren barruan kokatuta dago, Suspertze, Eraldatze eta Erresilientzia Planaren esparruan, eta Europar Batasunak finantzatua.
