Tokiko elikagai ekologikoen agertoki izango da Foru Plaza
Larunbatean —hilak 13— elikagai ekologikoen azoka egingo dute 10:00etatik 14:00etara. Berrikuntzen artean, kokapen aldaketa: Foru plazan izango da aurten, komertzio gunetik gertu.
Azoka ekologikoa egingo dute irailaren 9an. Tokiko elikagai ekologikoak lehen lerroan jarriko dituzte Biolur elkarteak, Errenteriako Udalak, Behemendi landa garapenerako elkarteak, eta Euskadiko Nekazaritza eta Elikadura Ekologikoaren Kontseiluak. Izan ere, larunbatean —hilak 13— elikagai ekologikoen azoka egingo dute 10:00etatik 14:00etara. Berrikuntzen artean, kokapen aldaketa: Foru plazan izango da aurten, komertzio gunetik gertu. Atlantikaldiaren programazioaren barruan, gainera, hilaren 21ean hainbat ekoerrezeta prestatzeko sukaldaritza tailerra egingo dute.
Bihartik, hilak 9, 13ra bitartean Madalen kaleko turismo bulegoan azokan erabili ahalko diren 5 euroko bonuak banatuko dituzte. Azokan erabili ahal izateko, gutxienez, 15 euroko erosketa egin behar da, pertsonako bono bakarra hartzeko aukera izango da, eta amaitu arte banatuko dituzte. Turismo bulegoaren ordutegia, asteartetik larunbatera 10:00etatik 14:00etara eta 16:00etatik 18:00etara da.
Azokan barazkiak, gaztak, eztia, marmeladak, eta bestelako elikagai batzuk erosteko aukera izango da. Informazioa ere zabalduko dute nekazaritza eta elikadura ekologikoari buruz, informazio panelen bidez; Biolur informazio puntua ere izango da. Tailer berezia ere antolatu dute Marta Barbaren eskutik Euskal Herriko tomate barietateen gainean.
Sukaldaritza tailerra
Atlantikaldiaren barruan antolatu duten sukaldaritza tailerrari dagokionean hainbat ekoerrezeta prestatuko dira zuzenean Lurraren Orena ekoizleak eta Miriam Chef Integrativa sukaldariak gidatuta. Bertaratzen direnek tokiko eta jasangarriak diren produktuak dastatzeko aukera izango dute. Parte hartzeko, izena eman behar da (klik hemen).
