Emakume guztiak aske dantza daitezen
Emakumeak munduko txoko orotan edozein musika estilotan dantza daitezen aldarria egin du Aria taldeak 'Dantzaren Iraultza' azken singlean; Emakumeen etxean aurkeztu dute primizian.
Aria taldeko Marina Landa.Nerea Gadu Aria taldeak single berria kaleratu du, Dantzaren iraultza, epe laburrean helduko den diskoaren aurrerapen gisa. Singlearen bideoklipa ere aurkeztu du taldeak, eta horretarako Errenteria-Oreretako Emakumeen etxea aukeratu du. Atzo egin zuen aurkezpen hori, primiziaz. 2023an sortu zuten Aria taldea Donostian eta pop kantak euskaraz egiten ditu, giro intimista eta ukitu elektronikoak uztartuta. Musika proiektuaren oinarria, Marina Landa kantautore errenteriarra da. Iñaki Ortego Lauroba taldeko pianista ohiak (teklatuak), Ion Larrañagak (bateria), Badmintones eta Aphaxia taldeetan ibilitako Iñaki Olaskoagak (gitarra elektrikoa) eta Alargun Beltzak taldeko Maialen Urretabizkaiak (baxua) osatzen dute talde donostiarra.
Abestiak mezu sozial argia zabaltzea duela helburu azaldu du Landak: “Emakumeak munduko txoko orotan eta edozein musika estiloan aske dantza daitezen aldarrikapena. Lotsarik eta beldurrik gabe dantzatzeko eskubidea da muina”.
Doinu alai eta energikoa du Dantzaren iraultzak, “elektropopera eramaten gaituzten melodiekin”.
abestiak arazo pertsonal eta kolektibo batean duela oinarria ere zehaztu du Landa ariako lider eta konpositoreak: “Balleta egiten nuen txikitan eta beti sentitu eta entzuten nuen nire gorputza ez zela aproposa dantza estilo horretarako, ez zela hori nire lekua. Bizipen horretatik dator dantzatzeak beti sentiarazi didan talka: gozamena eta lotsa; askatasuna eta beldurra”.
Berak bizitutako hori jendartean zabalduta zen kontua ohartu zela dio abeslariak, “emakume gehienek sentitu dute euren bizitzako momenturen batean edo bestean ez zutela dantzatzeko eskubiderik. Hori irauli eta iraultzaren parte izateko gonbita da Dantzaren iraultza“.
Bideoklipa Herri Arte Eskolan eta Jaizkibelen grabatu dute, eta Nerea Gadu aritu da zuzendari lanetan. Bideoan hainbat emakume azaltzen dira, dantzan, noski.
Singlea Aria taldearen bigarren diskoa izango denaren aurrerapena da. Datozen asteotan kaleratuko du.
