Pilota lehia bat baino askoz gehiago
Josetxo Etxandi Pilota Oroitaldiaren 49. ekitaldia ari dira jokatzen afizionatu mailako pilotariak, nahiz herritarrak.
Iazko herri mailako finaletan goraino bete zen Josetxo Etxandi pilotalekua. Santakrutzetako ezinbesteko jarduera bihurtu da Josetxo Etxandi Esku Pilota Oroitaldia. Aurten 49. ekitaldia du lehiak. Pilota txapelketa bat baino askoz gehiago da, ordea, Etxandiren oroimenezkoa: abuztutik, herriko kale giroa berpizten duen jarduera da. Aurten Imanol Ayarza Orbiso Patatas gogoan izan dute bereziki antolatzaileek.
Federatuena eta herri txapelketa ditu bere barruan Josetxo Etxandik. Lehenean etorkizunean izar izango direnak ari dira; bigarrenean, lezoarrenean, herriko izarrak daude. Federatuen finalak hilaren 14an (igandean) jokatuko dituzte Koldobike Gezala pilotalekuan (17:30); lezoarrenak, hilaren 21ean (17:00), nola bestela, Josetxo Etxandi frontoian.
Ioritz Urbieta herri txapelketaren antolatzaileetakoa da. Jakinarazi du aurten, osotara, 41 bikote ari direla bertan lehian, 82 pilotari beraz: 29 helduen mailakoak (zazpi emakumeenak dira), lau gaztetxoenak, eta beste zortzi haurrenak. «Izan dira bikote gehiago parte hartu duten urteak, baina oso pozik gaude aurten ere izan duen harrerarekin. Badago afizioa».
Lezoarren bilgune dira Etxandiko partidak. «Abuztuan giro polita sortzen da frontoian. Batez beste, 70-80 bat pertsona agertzen dira partidetara. Finaletan 500 ikusle inguru izaten dira. Lana da, baina ederra». Urbietak aitortu du, pilotaren aitzakiapean, pike jatorrak sortzen direla herrian.
