Lezoarrak, festara!
Palestinako herriarekiko elkartasuna lehenengo, eta ondoren festa. Hasi dira 2025eko Lezoko Santakrutz Jaiak.
Hasi dira ofizialki 2025eko Lezoko Santakrutz Jaiak. Lezoar guztiek dakite aurtengoen egunen banaketa ezohikoa izan dela. Izan ere, joan den asteburuan Piztu Lezoren Gazte Egunaren ingurukoak izan ziren, atzo ere bai girotze lanetan ibili ziren gazteak, eta gaur goizeko ekitaldien ondoren, 18:00etan, Palestinako herria babesteko mobilizazio jendetsua izan da. 19:00etan, ordea, hasi da sakramentu guztiekin udako azken festa aroa: alkate txikien pregoia, txupiazoa, Murixkako dantzarien Agurra, Tomas Garbizuko musika bandaren eta Muntarreko txistularien partetik Lezoko herria ereserkia… Hasiera kolosala.
Lur Lacasta eta Iker Askasibar izan dira jaiak hasteko ohorea izan dutenak, alkate txikiak baitira. Suziri botatzen ekitaldian Mikel Arruti alkatea izan dute konplize. Gaztetxoek urduri zeudela onartu dute, baina festak hasteko irrikaz. Esan dute santakrutzetan aukera asko daudela giro onean ibiltzeko eta lagunen arteko harremanak sendotzeko. Beraz, Jai Batzordeak egindako lana eskertu eta goretsi dute, eta haiek antolatutako guztietan parte hartzeko eskatu diete lezoarrei. Festetan euskara ahoan izateko irmo eskatu diete plazan ziren guztiei.
Hasierako ekitaldiaren ondotik eguneko beste ekitaldi kolosala danborradena da. Ixkulin, Tiñelu, Allerru eta Altzate elkarteetako danborradetako ehunka kideek ohorez kolpatuko dituzte makilak danborretan, ahal bada musikaren erritmoari eutsita (22:45ean hasiko dira danborradak). Lau lagunarteak gauerdia baino lehentxeago elkartuko dira (23:45) Gurutze Santuaren plazan burrunba kolektiboari ekiteko. Denak batera. Zarata eta festa. Alaitasuna. Lezoartasuna plazan.
Egunen banaketaren egitateari tiraka, bihar (igandea) i-14 egun handia izango da. Santakrutz Eguna. Herrian kuadrillen bazkari erraldoiarena bezala ezagutzen dena. Eguneko parranda totala; litekeena da lezoar askok etzirako (astelehena) jai hartu izana euren lantokietan, biharko martxa (behean egitaraua) jarraitzeko nahikoak lan izango dituztelako i-14aren zati direnek. Baten bati astelehenean lan egitea tokatzen bazaio, espero dezagun lankideen aldetik elkartasuna izango duela, eta hainbat zeregin erraztuko dizkiotela Lezo eta herriko festak gogoz bizi izan dituzten horiei.
Jarraian, gaurko hasiera ekitaldiaren hainbat irudi eta bideoa:
Santakrutzak 2025. Datozen egunetako egitaraua.
Gaur (hilak 13, larunbata)
- 22:45. Allerru, Altzate, Ixkulin eta Tiñelu elkarteen danborradak abiatuko dira.
- 23:45. Danborradak Gurutze Santuaren plazan batuko dira.
- 01:30. DJ Enabil Karlos Saldisen.
Bihar (hilak 14, igandea)
- 10:00. Diana Munttarreko txistulariekin.
- 11:00. Meza Nagusia San Juan Bataiatzailearen elizan.
- 12:00. Herri kirolak Gurutze Santuaren plazan.
- 12:00. Erraldoi eta buruhandiak.
- 12:30. Sisti&Pika DJekin kalejira i-14 Eguna hasteko.
- 13:30. I-14 Egunaren topaketa, txupinazoa eta bertsoa Gurutze Santuaren plazan.
- 14:00. Jubilatuen bazkaria.
- 14:30. I-14ko herri bazkaria Lezo Herri Eskolako jolastokian. 17:00etan, Andoni Ollokiegiren musika emanaldia.
- 16:30. Goiko Plazan, haurrentzako puzgarriak.
- 17:30. Josetxo Etxandi Oroitaldiko federatuen finalak Koldobike Gezala pilotalekuan.
- 18:00. Erraldoi eta buruhandiak Bekoerrotatik.
- 18:30. Lezo Herri Eskolatik, Jaixkipe txarangarekin kalejira.
- 20:30. Karlos Saldisen, Muxutruk taldearekin erromeria.
- 22:00. Zezensuzkoa Gurutze Santuaren plazan.
- 00:00. Karlos Saldisen, DJ Herra.
Etzi (hilak 15, astelehena)
- 11:00. Perkusio tailerra Karlos Saldisen.
- 17:00. Grafiti lehiaketa (+12) Markesanen.
- 17:00. Lasterketak (haurrentzat) Gurutze Santuaren plazan.
- 18:30. Erraldoi eta buruhandiak.
- 19:30. Bertso saioa Gurutze Santuaren plazan: Andoni Egaña, Sebastian Lizaso, Oihana Iguaran eta Saioa Alkaiza. Gai jartzailea: Amaia Agirre.
