Ander Garaiarri harrera egin diote Oiartzungo udaletxean
Europako txapelduna bilakatu zen Garaiar abuztuan, eta orain, bere herrian harrera egin diote udaleko hautetsi batzuek.
Urte gozoa izan du Ander Garaiar kirolari oiartzuarrak. Udan, Europako txapelketan urrezko domina lortu zuen, 20 urtetik beherako kategorian, eta lehenago, marka ezin hobeak erregistratu zituen Espainiako txapelketan, 100 eta 200 metroetan. Lortutakoa aitortzeko, harrera egin zioten Oiartzungo udaletxean, larunbatean.
Udaberritik zeukaten zorra kendu dutela adierazi zuen Edorta Fernandez kirol zinegotziak: “Aspaldiko zor bat kitatuko dugu gaur, udaberrian hasitakoa. Marka bikainak egin zenituen maiatzean, eta ordutik lortzen ari zarena itzela da”. Garaiarren lana goraipatu nahi izan zuen zinegotziak, eta adierazi zuen udaletik “ikaragarri” baloratzen dutela egindakoa. “Zure esfortzu, konpromiso eta sakrifizioak egundoko meritu du, bereziki atletismoa bezalako bakarkako kirol batean”.
Fernandez, Oihana Irastorza eta Nora Velez del Burgo hautetsiak bertan izan ziren, udaletxearen izenean haien aitortza ematen. Haiekin batera, Haurtzaro Atletismo Taldeko lagunak ere ondoan izan zituen Garaiarrek. “Orain arte lortutakoak ate asko ireki dizkizu. Gozatu bideaz eta ziur gaude aurrerantzean ere gaurkoa bezalako askoz harrera gehiago egingo dizkizugula!”, esan zuen Fernandezek.
