Atlantikalditik ere Palestinari arnas
Sol Band Gazako musika taldeak inauguratu du Atlantikaldiaren hamabigarren ekitaldian Itsas argi nagusiko agertokia. Palestinarrek bertaratutako dozenaka eta dozenaka herritarren babesa jaso dute.
PAlestinaren aldeko mezua atzo Atlantikaldian. Kultura eta musika elkartasun hauspo bilakatu ziren atzo. Atlantikaldiaren Itsasargi nagusiaren agertokia estreinatu zuen jaialdiaren hamabigarren ekitaldian Sol Band musika talde palestinarrak. Musika emanaldi bikaina, goi mailakoa, eskaini zuten Gaza iparraldean sortutako taldeko artistek. Bertaratutako ikusleek txalo artean, Palestina askatu oihuekin, eta Palestinako banderak eskutan zituztela hartu zituzten.
Igor Otxoa musikari eta Gernika Palestina herri Ekimeneko ordezkariak hartu zuen hitza emanaldia hasi aurretik.
Atzokoa ez zela “ohiko” emanaldi bat izango azaldu zuen Otxoak, “egoera ez da ohikoa, agertokian ariko diren pertsonak irudika ere ezin dugun sufrimendua dute soinean. Zortzi hilabete izan ziren beraiek Gazan Israelen genozidiopean, bonbardaketak jasaten, desplazatuak… irtetea lortu zuten, baina euren familiak han dira, barruan”.
Gaza Iparraldekoak dira Sol Band musika taldeko kideak, Israelgo okupazio armada zonalde hori ari da eraso eta inbaditzen une honetan, “sei musikarien artetik soilik kide baten etxea zen zutik; duela bi egun bere familia bertan zegoela, bertatik atera eta ordubetera eraitsi zuten. Beste taldekide baten kasuan, bi eraikinetako familia etxea zuten eta horietako batera bonba jaurti eta sei familia kide erail zituzten, bera ondokoan lotan zen bitartean. Egunero gertatzen ari denaren berri jasotzen ari dira, eta batzuetan ez dituzte jasotzen; hori da okerrena. Atzotik [herenegun] moztuta daude komunikazio guztiak eta ez dute Gazan diren senideen berririk, horrek suposatzen duenarekin” azaldu zuen Otxoak.
