Handia egin duzue, Batelerak!
Euskotren Ligan aritzeko play-offa irabazi, eta onenekin lehiatuko dira 2026an San Juango emakume arraunlariak.
Sanjuandarrak, gaur, ospakizun betean.Aitor Arrizabalaga Euskotren Ligara igo da San Juanen emakumeen trainerua. Handia egin dute Batelerek! Atzo eta gaur jokatu den play-offean lehenak izan dira, atzo Bermeon bigarren izan, eta gaur Portugaleten irabazi ondoren. Ekainean urruti, eta agian ezinezko zirudiena egin dute. 2026ko sasoian San Juanen emakumeen eta gizonen traineruak, beraz, Kantauriko ontzi onenen artean izango dira. 2018a izan zen Batelerak traineruak Euskotrenen lehiatu zuen azken urtea, urte hartako liga ere irabazi zuten. Zazpi urte gorabeheratsuren ondotik gaur iritsi da harrobi lanaren emaitza.
Atzo jada bideratua utzi zuten arrosek igotzeko aukera. Donostiarraren atzetik bigarren izanda, faborito kartela irabazi zuten Bizkaiko herrian. Zarautz atzetik izan zuten ia hiru segundora; sasoiko kontrario nagusi izan dituzte zarauztarrak, eta gaurkoan, begi bat urdinetan jarria zuten.
Baina gaurko Portugaletekoan ez dute begirada inora eraman sanjuandarrek. Haien botean jarri dute bista, intentzioa, indarra eta talentua. Talentu gaztea, eskifaiako kide asko ez baitira 20 urtera iristen. Agian, ustekabeko nagusitasunez irabazi dute gaurkoa. Ustekabe ala ez, merezia garaipena eta horrek dakarren sari handia: onenen ondoan izatea.
Gaurko emaitzen berri zehatza izateko, baliatu esteka hau.
Arratsaldean ongietorria egingo diete herrian gaurkoan Pasaiako arraunaren heroi bihurtu diren emakumeei.
