Iritsi dira azken geltokira
Duela hamar urte sortu zen Oiartzunen Autobus Magikoa taldea, eta zazpi urte kontzerturik eman gabe egon ondotik, larunbatean egin zuten azkena, Ugaldetxon.
Herritarrek bazekiten hilaren 27a egun handia izango zela; tira, ez oiartzuarrek bakarrik. Ugaldetxoko festak dira, eta egitaraua argitaratu zutenean poztasun handia eraman zuten zenbaitek, Autobus Magikoak hitzordu berezia baitzuen.
Zazpi urte izan dira oiartzuarrak kontzerturik eman gabe, baina taldearen sorreratik hamar urte bete diren honetan lortu eta sortutakoa ospatu nahi izan dute musikariek. Eta, horretarako, bi hitzordu izan dituzte: lehena Hatortxu Rock jaialdia izan zen, eta bigarrena, berriz, etxean, Oiartzungo Ugaldetxo auzoan.
Poztasuna gailendu zen berri horrekin, baina taldekideek argi utzi dute Oiartzun Irratian egindako elkarizketa batean ez dela itzulera bat izan, “gustatuko litzaiguken agur dezente bat”, baizik.
Gaueko hamarretan hasten ziren larunbateko kontzertuak, eta Autobus Magikoa bigarren taldea zen, aurretik Dantzall Sound baitzegoen. Baina, arratsaldeko zazpiak jo baino lehen dozenaka pertsona karpan eserita zeuden dagoeneko lekua hartu eta kontzertua bertatik bertara ikusi ahal izateko.
Jende andana elkartu zen, eta Ugaldetxoko bizilagunek zein herritarrek espero bazuten ere, harrituta geratu ziren Autobus Magikoak bildu zuen jendetzarekin. “Auzokoak gara baina hau ez dugu sekula ikusi, izugarria da”, zioen Ugaldetxoko bizilagun batek. Euskal Herriko zenbait txokotatik bertaratu ziren Ugaldetxora: Gipuzkoako eskualde ezberdinetatik, Nafarroatik…
Karpa kanpoaldean taldeak hamargarren urteurren honetarako propio saldutako arropa saltzeko postu bat zuen jarrita, eta ez zen unerik inor bertaratzen ez zenik; kamisetak, jertseak eta zapiak zituzten salgai, eta ehunka saldu zituzten.
Dantzall Sound amaitu, eta iritsi zen jendeak horrenbeste itxarondako unea: Autobus Magikoaren txanda. Oihuak eta urduritasuna, hori senti zitekeen Ugaldetxon. Taldekideak oholtzara atera, eta txalo zaparrada gailendu zen. Pozik zegoen herria.
Gaueko lehen kontzertua hasi zenerako txosnagunea beteta zegoen; ez zegoen ia ibiltzeko lekurik ere, baina jendeak ez zuen amore eman, nola edo hala Autobus Magikoa ikustera joan baitziren denak. Alabaina, karpa txiki geratu zen, eta ehunka izan ziren karpa kanpotik zein errepidean (karparen alboan) kontzertua jarraitu behar izan zutenak. Denak pozik, ordea, kontzertu horrek duela urte batzuetako garaiak bizitzera eraman baitzituen zenbait herritar.
Oiartzuarren emanaldia ez zen kontzertu soil bat izan, antzerkia, zenbait abestiren bertsioak, gonbidatuak eta mezu politikoen aldarriak ere izan baitziren protagonista. Txiltxoko kolektiboko Peru Bengoetxea izan zen gonbidatuetako bat, eta ikusleek harrera beroa egin zioten oiartzuarrari, denak jarri baitzituen dantzan. Era berean, Palestinaren aldeko mezuak behin baino gehiagotan ozen oihukatzeaz gain, taldekideek herritarrak All cacahuetes are bastards! Muntai polizialik ez! lelopean antolatutako Cacahuetefest jaialdira joatera gonbidatu zituzten.
Hamar urte igaro dira Autobus Magikoa Oiartzunen sortu zenetik, eta modu ezin bereziago batean egin dute ospakizuna. “Inoiz izan dugun kanpo ekintza bereziena izango da, dudarik gabe”, zioten sare sozialetan taldekideek, eta larunbateko hitzordua ikusita, ezin daiteke zalantzan jarri horrela izango zenik.
Jarraian, HITZAk bildutako zenbait irudi.
