San Pedroko Musika eta Abesbatza asteak lau hamarkada beteko ditu
Zikloaren 40. ekitaldiak bost emanaldi izango ditu, den-denak barrutiko parrokian. Lehen kontzertua urriaren 11n izango da, 20:00etan.
Ondartxo kultur elkarteak eta Pasaia Musikal Udal Musika Fundazioak prest dute San Pedroko 40. Musika eta Abesbatza astea. Aurtengo programazioak bost emanaldi izango ditu, den-denak San Pedroko parrokian, eta musika koraletik ganbera musikarainoko proposamenak biltzen ditu. Lehen emanaldia urriaren 11n izango da, 20:00etan. Eva Ugalderen zuzendaritzapean, Kanta Cantemus Abesbatzak Bidegurutze kontzertua eskainiko du barrutiko parrokian. Musika eta abesbatzaren zikloko emanaldiak urrian eta azaroan izango dira, eta Santa Zeziliaren ospakizun bereziarekin itxiko dira, azaroaren 22an. Kontzertu horretan Antxoko Bandaren mendeurrena goratuko dute.
Honakoa adierazi du Aitor Brion Kultura eta Ondare zinegotziak: “Udazkenaren hasieran musikaz hitz egitea San Pedroko Musika eta Abesbatza asteaz hitz egitea da. Ziklo honek lau hamarkada betetzen ditu, eta, urtero, gero eta kalitate handiagoko programazioa eskaintzen du, jende asko erakartzen duena barrutira”.
Bestalde, Gorka Miranda Pasaia Musikaleko zuzendariak proposamenen aniztasunean jarri du arreta: “Aurtengo egitaraua bereziki anitza eta erakargarria da eta, beti bezala, San Pedroko parrokia izango da eszenatoki nagusia. Bere edertasunak eta akustikak kontzertu bakoitzaz gozatzeko marko paregabe bihurtzen dute”.
Azkenik, Brionek eskerrak eman dizkie antolatzaile diren Ondartxo elkarteari eta Pasaia Musikali: “Bereziki eskerrak eman nahi dizkiegu Ondartxo Abesbatza Elkarteari eta Pasaia Musikal Udal Fundazioari egindako antolakuntza lan neketsuagatik, eta, batez ere, Jose Ignacio Elortegiri, zikloaren arima nagusiari; izan ere, hark diseinatzen du zikloa mimo handiz, eta urtez urte hura hobetzeko grina etengabea erakusten du. Bere lanak Pasaiako musika komunitate osoaren aitorpena merezi du”.
San Pedroko Musika eta Abesbatza astea
- Urriak 11: Kanta Cantemus Abesbatzaren Bidegurutze kontzertua. 20:00etan, San Pedroko parrokian. Zuzendaria: Eva Ugalde.
- Urriak 17: EASO Sinfoniettaren Dvorák & Ravel. 20:00etan, San Pedroko parrokian.
- Azaroak 7: Lorea Lopez sopranoaren eta Lucia Arzallus pianistaren kantu errezitaldia. 20:00etan, San Pedroko parrokian.
- Azaroak 8: Karmele Castillo biolontxelo jotzailearen eta Nadiia Stadna pianistaren ganbera kontzertua. 20:00etan, San Pedroko parrokian.
- Azaroak 22: Santa Zeziliaren ospakizuna: omenaldia Antxoko Bandari mendeurrenagatik. 17:30ean, San Pedroko parrokian.
