Zinema dokumental jaialdirako lanak aurkez daitezke oraindik
Errenteriako Giza Eskubideen Zinema Dokumentalaren Jaialdiaren laugarren edizioa abenduaren 9tik 14ra egingo dute, eta parte hartzeko aukera azken txanpan sartu da.
Ander Iriarte 'Indarkeriaren oi(h)artzunak' lanarengatik saria jasotzen. Gari Garaialde / Bostok Photo Errenteriako Giza Eskubideen Zinema Dokumentalaren jaialdian lanak aurkezteko epea urriaren 5ean bukatuko dela jakinarazi du udalak. Jaialdiaren laugarren edizioa abenduaren 9tik 14ra egingo dute, eta parte hartzeko aukera azken txanpan sartu da. Izen ematea online egin behar da (klik hemen), eta parte hartzeko 60 minutu arteko iraupena duten film labur eta ertain dokumentalak aurkeztu beharko dira.
Giza Eskubideen Nazioarteko Eguna da abenduaren 10ean eta egun horren bueltan antolatzen da urtero jaialdia, Giza Eskubideen Jardunaldiekin lankidetza sendotuz horrela, “aliantza horri esker, jaialdia erreferente bilakatu da herrian, zinemaren, kultura kritikoaren eta gizarte sentsibilizazioaren inguruan hainbat lekutako zinemagileen begiraden bidez”.
Laugarren ekitaldian ere, helburua argia izango du jaialdiak: Gizartean dauden bidegabekeriak agerian uztea eta salatzea. Ez hori bakarrik, zine dokumentalaren bidez istorio konprometituak kontatzeko ausardia duten sortzaileen talentua eta sormena ere bultzatu nahi du.
Jaialdiaren zuzendaritza artistiko eta programazioaren ardura Ozzinemak du, eta Errenteriako Udaleko Kultur aniztasuna, Garapenerako Lankidetza eta Giza Eskubideak sailaren babesa eta finantzaketa jasotzen ditu.
