Sei aste ondarea bertatik bertara ezagutzeko
Ondarearen Europako Jardunaldien barruan egitarau oparoa ondu dute Errenteriako Udalak eta Eresbil Musikaren Euskal Artxiboak elkarlanean.
Beheko kalea.Oreretako Argazkiak Errenteriako Udalak eta Eresbil Musikaren Euskal Artxiboak bat egin dute Ondarearen Europako Jardunaldiekin, eta bisita gidatuak eta familientzako tailerrak antolatu dituzte sei asteburutan, urriaren 4tik azaroaren 7ra. Jarduera bakoitzak bere berezitasunak dituela azaldu dute, baina guztiek erantzuten diotela gai komun bati: kultur ondarearen eraikuntzari. Izan ere, hori da aurtengo jardunaldi horien leloa, Ondarea eraikitzen.
Lehenengo hitzordua larunbatean bertan izango da. Errenteriako altxorrak azaleratzen tailerra egingo dute familiei begira, euskaraz, 12:00etatik 13:30era. Dinamikoa izango da eta helburua da Errenteriako alde zaharrean egin diren aurkikuntza arkeologikoak eta eskaintzen duten informazioa ezagutaraztea. Arkeologiaren garrantzia nabarmendu eta metodologia zientifikoa dela ere aldarrikatu nahi du. Doakoa da eta aldez aurretik izena eman beharko da parte hartu ahal izateko 943 49 45 21 telefono zenbakira deituz edota posta elektronikora mezua bidalita (klik hemen). Hartzaileak, 8-16 urte arteko ahurrak dituzten familiak dira.
Tailer bera, baldintza eta ordutegi berean errepikatuko dute hilaren 18an.
Hilaren 11 eta 25ean euskaraz eta gaztelaniaz, hurrenez hurren, Kasko Historikoan ezkutatuta bisita gidatua egingo dute; horiek ere, 12:00etatik 13:30era. Errenteria-Oreretako alde zaharrean egin diren lan eta aurkikuntza arkeologikoez hitz egingo dute eta udalerriko eraikin enblematikoenak ezagutzeko parada eskainiko du, baita horietako baten barrualdea eta dituen altxorrak ezagutzekoa ere: Jasokundeko Andre Mariaren parrokia. Doakoak dira bisita gidatu horren bi jardunaldiak, baina aldez aurretik izena eman behar da aipatutako telefono zenbakiaren edota posta elektronikoaren bidez.
Hartzaileak, haurrak eta helduak.
Hirugarren jarduera, Eresbil Musikaren Euskal artxiboarekin lotuta. Izan ere, Kultura fabrikak: material elektrikotik musika dokumentaziora izenburupean bisita gidatua antolatu dute. Lau saio egingo dituzte: hilaren 31n ostirala 17:00etatik 18:00etara gaztelaniaz, eta 18:15etik 19:15era euskaraz; eta azaroaren 7an 17:00etatik 18:00etara gaztelaniaz eta 18:15etik 19:15era euskaraz.
Eresbilek gaur egun Musikaren Euskal Artxiboa kokatzen den eraikinaren historia lehen eskutik kontatuko die bertaratzen diren bisitariei, industria ondarearen berrerabileraren eta kultura helburutarako eraldaketa arkitektonikoaren adibide nabarmen bat baita euren egoitza. Bisitaldian eraikinaren historia eta artxibo eta dokumentazio erabileretarako egokitze prozesua ezagutzeko aukera egongo da, baita Eresbilek musika ondarearen berreskuratze eta kontserbazioan egiten duen lana ere. aldez aurretik izena eman behar da 943 00 08 68 telefono zenbakiaren edota posta elektronikoaren bidez (klik hemen).
Errenteria-Oreretatik kanpo, Ondarea eraikitzen programa orokorra 126 ekitaldi baino gehiago eskaintzen ari da Gipuzkoako 37 herritan irailaren 27tik. Edizio honetako jarduerak ondarea bizitzeko, eraikitzeko eta zaintzeko moduari buruzko begirada berriak ahalbidetzen dituzte. Gipuzkoakoak kontsultatzeko egin klik hemen; Araba, Bizkai eta Gipuzkoan antolatu dituztenak ikusteko berriz, egin klik hemen.
