Festen aroaren ondoren, kultura
Iraila festa kutsukoa izan da Lezon. Udazkenean, berriz, hainbat kultur egitasmo jasoko ditu herriak.
Ainhoa Salaberria Kultura teknikaria, eta Jon Legorburu Kultura zinegotzia, udazkeneko ekitaldien berri ematen.Lezoko Udala Iraileko Gazte Egunaren barrukoak, santakrutzak, Altamirako festak eta Garagardo Festa egin ondoren, udazkenean kulturarako tartea izango dute lezoarrek. Urtea bukatu arteko proposamenen aurkezpena egin du Lezoko Udalak. Hala, Gezalako programazio iraunkorraz gaindi (antzerki saioak, dantza, Lezoko Zinema Ttikia), Andreone Udal Liburutegiak urtero egiten dituenaz aparte (OrriBakaR Lehiaketa, ipuin kontaketak, literatura taldeen bilkurak), eta Tomas Garbizu Musika Eskolaren emariaz harago, hiru egitasmo handi gauzatuko dira herrian. Ekitaldi horien guztien berri izateko joan HITZAren agendaren atalera, edo Lezoko Udalaren webgunera.
Jon Legorburu Kultura zinegotziak eta Ainhoa Salaberria Kultura teknikariak aurkeztu dituzte udazkeneko kultur ekitaldiak. Legorburuk zehaztu du programazioarekin Lezoko bizitza indartu nahi dutela, “herritarrei aukera emanez herrian bertan kalitatezko eskaintzaz gozatzeko”. Salaberriak zifretara eraman du eskaintza, eta aipatu du irailetik abendura bitarte 47 ekitaldi izango direla Lezon, askotarikoak, “haurrentzat zein helduentzat, eta formatu ezberdinen bidez guztion interesak ase nahi ditugu”.
Udazkeneko asmo bereziak hiru dira. Batetik, asteburu honetan (larunbatean) egingo da Antzerki Testu Laburren Lehiaketaren finala, edo Lezoko III. Irakurketa Dramatizatuen Partida. Herri Eskolako jolastokiak jasoko du arte eszenikoen zirrara era berezian bizitzeko jarduera 19:30ean hasita.
Denboran hurrena Antzerki Ametsetan topaketa izango da, aurten bigarrenez egingo dena. Antzerki konpainia amateurren topaketa izango da, eta hilaren 18, 25 eta 26an izango dira horren barruko emanaldiak.
Hirugarren egitasmo handia Poesia Kaia izango da, bosgarrena izango da. Azaroaren 6tik 8ra olerkigintza herritarrengana gerturatzeko jarduerak izango dira herriko hainbat aretora.
Horietako gehienetara joateko sarrerak jada eskuragarri daude Lezoko Udalaren sarrera salmenta zerbitzuan. Alta, Gezala Lagun txartela dutenek edo egiten dutenek hainbat abantaila eta deskontu izango dituzte kultur ekitaldi horietarako.
