Urtzen kontzertua, San Pedrotik Antxora eguraldiagatik
Larunbaterako euria emana dago. Horregatik Urtz taldearen bidea aitortzeko kontzertua San Pedroko lonjaren atarian ezingo da egin. Antxoko Ibaiondo pilotaleku estalian izango da emanaldia.
Joan den igandean egin zuten azkenean Antxon egingo den kontzertuaren entsegu orokorra.Pasaiako Udala Eguraldiagatik, plan aldaketa nabarmena. Urtz taldeak, bere 40 urteko bidea ospatzeko eta pasaitarrekin partekatzeko larunbatean (hilaren 4an) San Pedroko lonjaren pareko zabalgunean ematekoa zuen kontzertua, Antxoko Ibaiondo pilotaleku estalira lekualdatu dute. 19:30ean hasiko da frontoi tapatuko musika jaialdia, eta sarrera doan da. Eitb-k kontzertua osorik grabatuko du, ondoren Oholtzan saioan emititzeko. Euria emana dago larunbaterako, beraz, lonja aurreko plazan kontzertua egitea ezinezko litzateke.
Taldeak eta udalak elkarrekin hartutako erabakia izan da kontzertua tokiz aldatzearena. “Pena handiarekin hartu dugu erabakia”, esan du Aitor Biron Kultura zinegotziak: “Aukera paregabea genuen San Pedron emanaldiaz gozatzeko, baina ziur gaude pasaitarrek eta beste herrietatik etorriko diren bizilagunek asko gozatuko dutela taldeak prestatu duen ekitaldiarekin”.
Izan ere, larunbatekoa ez da izango Urtzen kontzertu soil bat. Hainbat gonbidatu izango dira San Pedroko laukotearekin oholtza konpartitzen. Azken egunetan hainbat entsegu egin dituzte taldekideek eta gonbidatuek (horietako batena da albiste honekin batera doan argazkia) den-dena egoki joan dadin. “Entsegu horietan nabarmendu da musikarien arteko musika metaketa eta sintonia berezia, eta elementu horiek guztiek atmosfera musikal paregabea sortuko dutela baieztatu da. Izan ere, taldearen abesti batzuk modu berezi zein berritzailean aurkeztuko dira, eta ibilbide osoa modu esanguratsuan oholtzan islatuko da”. Gonbidatuen artean Pasaiako dantza eta musika eragileak izango dira, besteak beste: “Ez da ohiko zuzenekoa izango, baizik eta omenaldia eta berriz elkartzeko gau berezia: taldearen ibilbide osoaren errepasoa, hasieratik gaur arte”.
Garraio publikoa
Jende asko espero da azkenean Antxon egingo den kontzerturako. Horregatik, Pasaiako Udalak musika emanaldira joango direnei esan die garraio publikoa rabil dezatela, bai herriko beste barrutietatik Antxora doazenei, bai eta beste herrietatik hara joango direnei ere, “aparkalekuekin arazorik egon ez daitezen”
