37 lan eskaintzatan hautagaitzak jasotzeko epea zabaldu du udalak
Errenteriako Udalak 37 lan kontratu sustatzeko programak martxan jarri ditu, eta horrenbestez, horietara hautagaitzak aurkezteko epea zabalik duela jakinarazi du.
37 dira eskainiko dituzten lanpostuak.Izaro Perez Loperena Errenteriako Udalak 37 lan kontratu sustatzeko programak martxan jarri ditu, eta horrenbestez, horietara hautagaitzak aurkezteko epea zabalik duela jakinarazi du. Batetik, 25 lanpostu eskaintzen ari da, Lanbideren 2025eko enplegua sustatzeko tokiko ekintzetarako dirulaguntza deialdiaren bidez; bestetik, 12 lanpostu eskaintzen ari da tokiko erakundeek gazteak kontratatzeko laguntzen 2025eko ekitaldiko deialdiko dirulaguntzen bidez, EGF Plus 2021-2027 programaren barruan.
Guztietan Lanbideren bidez inskribatu behar da. Hori horrela, enplegu eskatzaile gisa izena emateko eta datuak eguneratzeko dei egin die udalak interesdunei.
Aurrekontu osoa 1.033.758,46 eurokoa da, eta Lanbidek %69,87a finantzatuko du.
25 lanposturen deialdian parte hartzeko, langabetua izan behar da eta Lanbiden lan eskatzaile gisa altan egon, bai hautagaitza bidaltzen den momentuan, bai kontratua hasteko egunaren bezperan ere. Gainera, Oarsoaldeko herriren batean erroldatua egon behar da, Errenteria-Oreretan, Lezon, Pasaian edo Oiartzunen. Izena eman aurretik Lanbiden curriculuma eguneratua izatea garrantzitsua dela jakinarazi du, bestalde.
Izen emateak, Lanbiden egin behar dira urriaren 10era arte; administrari laguntzaileen eskaintza azaroan argitaratuko da. Eskainitako lanpostuak, ondokoak: Administrari laguntzailea (4 lanpostu), Garbitzailea (3 lanpostu), Ofizial arotza, Ofizial elektrikaria (2 lanpostu), Ofizial errementaria, Ofizial igeltseroa, Ofizial iturgina, Ofizial lorezaina, Ofizial margolaria (2 lanpostu), Brigadarako peoia (2 lanpostu), Peoi arotza, Peoi elektrikaria (2 lanpostu), Peoi errementaria, Peoi igeltseroa, Peoi iturgina, Peoi lorezaina.
Hamabi lan eskaintza gazteentzat
Deialdi hauetan eskatzen diren baldintzak lanpostu bakoitzerako berariaz eskatzen direnez gain, 16 urte baino gehiago eta 30 baino gutxiago izan behar dira kontratazioaren momentuan; Lanbiden alta emanda egotea eta bete behar duten lanpostuaren maila betetzea; eta Gazte Bermerako Sistemaren Fitxategian inskribatua egotea.
Izen emateak Lanbiden egin behar dira, hilaren 15a baino lehen, eta honakoak dira eskainitako lanpostuak: Hezkuntza eta Gazteriako teknikaria; Berdintasun teknikaria; Gizarte Langilea; Kultur Teknikaria; Komunikazioko teknikaria; Ingurumen teknikaria; Kultur administraria; Kontratazioa eta Ondare administraria; Hirigintza, Ingurumena eta Jasangarritasun administraria; Kultur Aniztasun administraria; Liburutegiko dinamizatzailea; eta Giza Baliabideetako administraria.
Informazio gehiago behar dutenek, Oarsoaldea Garapen Agentzian jaso dezakete 943 51 02 00 telefono zenbakira deituta edo web orrian (klik hemen)
