Energiaren autokontsumo kolektiborako plan bat eskatu du PSE-EEk
Mozioa aurkeztu dute sozialistek trantsizio energetikoaren arloan "ekintza zehatzak" exijitzeko.
Trantsizio energetikoaren arloan neurri zehatzak nahi ditu Pasaiako PSE-EEk. Hori horrela, jakinarazi du mozioa aurkeztu duela gaia landu eta egungo gobernu taldeak bide horretan urratsak egin ditzan. “Benetako konpromisoa eta ekintza zehatzak exijitzen ari gara gobernu taldeari, EH Bildu eta Podemosi”, esan du Lore Suarez, sozialisten bozeramaleak.
Alkateari, “lidergo falta” eta gobernu taldeari “paralisia” egotzita, energia komunitateen sustapena “atzean” utzi dutela esan du Suarezek, “hauteskunde garaian agindu bazuten ere”. Pasaia aitzindari izan zela lehen energia komunitatea sortu zuelako gaineratu du sozialistak, “tokiko industriak eta aldundiko Jasangarritasun sailak sustatuta, baina ordutik egungo gobernu taldeak ez dio jarraikortasunik eman proiektuari, ezta komunitate berririk bultzatu ere. Bi urte geroago, hitzaldi batzuk antolatzeko eskaera baino ez diote egin aldundiari”.
Mozioan bost puntu zehatz aipatu dituzte sozialistek. Anbiziotsua den plan bat diseinatzea udalerri guztian barrena autokontsumo kolektiboaren eredua zabaltzeko; partekatutako energia berriztagarria ezartzeko udal espazioak identifikatzeko azterketa egitea; aldundiak eskura jartzen dituen bitarteko eta laguntzak baliatzea; merkataritza eta herritarren parte hartzea sustatzeko formazio eta sentsibilizazio programa sortzea; eta azkenik, gardentasuna bermatzea aldiro egindako aurrera urratsen berri emanez plenoan.
Bukatzeko “ekintzetara pasatzeko unea” dela esan du Suarezek, “Komunitate energetikoek herritarrentzat dituzten onura ekonomiko, sozial, eta anbientaletarako aukera kentzen ari da gobernu taldea”.
