Bi tailer berri, Torrekuan
Hilaren 14an eta 23an egingo dituzte ikastaroak eta herritar guztiak deitu dituzte parte hartzera.
Torrekua teknologia libreen talaia gisa ateak zabaldu zitueneko ekitaldiko argazkia. Torrekuan tailer eta ikastaroak antolatzen jarraitzen dute, eta hilabete honetarako eskaintza bikoitza ondu dute. Hilaren 14an izango da lehena Teknologia denontzat goiburuarekin. 17:00etan hasiko da, Torrekua eraikinaren hirugarren solairuan, eta saioan gailuen segurtasunari buruzko zalantzak argituko dituzte. Hala, eskuko telefonoak jasotzen dituen datuak, haren konfigurazioa, konexio seguruak egiteko moduak izango dituzte hizpide, finean, gailua babesten erakutsiko diete bertaratzen direnei.
Bigarren hitzordua, Hitzaurrea, hilaren 23an jarri du eta ludikoagoa izango da. 17:00etan hasiko da eta Torrekua eraikinaren hirugarren solairuan egingo dute juntadizoa, handik herriko kaleetara ateratzeko. Etorkizuna nolakoa izango ote den pentsatzen jarriko dituzte tailerrera gerturatzen direnak eta soinu esperientzia digital batean murgildu. Eskuko telefonoa eta aurikularrak beharko dituzte parte hartzaileek, esperientzia azaldu dutenez, “oinez gertatzen den jolas bat delako”.
Piszifaktoria ideien laborategiak eta Fikzio Fabrikak ibilbide erreal bat proposatuko diete bertaratzen direnei. Torrekuatik abiatuta telefonoa eta aurikularrak baliatuta istorio batean barneratuko da norbera, “gure erabakien arabera batera edo bestera joango da istorioa”.
Aurretik solasaldia egingo dute proiektua aurkezteko.
Ikastaro eta tailerren bidez teknologia herritar denen eskura jarri nahi du Torrekuak, “komunitatea sortzen, ikasten eta elikatzen gaituzten espazioez gozatzen jarraitzeko aukera berria izango dira bi ikastaroak”.
